eSefarad Noticias del Mundo Sefaradi
Ver todos los artículos de esta sección
Primavera en Israel
Yehuda Hatsvi
Segun el kalendario, la primavera komensa en Israel en el dia de 21 Marso. Oganyo mos tadro un poko la primavera por kavzo de (grasias a) las bendichas luvyas en este pais en el invierno de 2019.
Aki mas abasho puedesh meldar lo ke les ensenyi a mis elevos de judeoespanyol en 2016.
En las ojas ke les dava para meldar en kaza, uzava yo letras de Vatodienu (letras djigantes), para ke les sea todo mas fasil i klaro:
Mozotros no mos konsentimos ke el sol kruzo el ekuador, anteyer, en este dia de alhad, 21 de Marso 2016.
Ma ansi mos dizen los astronomos, i ke en akel punto (en la parte del norte de muestro globo) empeso la primavera.
En la parte del sud del globo – empeso el otonyo.
En este dia, el sol aparesyo egzaktamente en el oriente, i apuesto egzaktamente en el oeste (oksidente).
Este fenomeno se yama en Latin Equinox. O, mas simple, «el punto de la igualidad».
Kere dizir ke la longura del dia kon la longura de la noche es la mizma, es igual.
Tornando a la primavera de 2019, vos do aki un enlase kon “la primavera”, del konserto djenial para violin, kompozado por Antonio Lucio Vivaldi:
Personalmente, a mi me avla mijor una kantigita vieja en ebreo, eskrita por Efrayim Talmi.
Tres kompozitores ebreos eskrivieron muzika para este chiko kante:
Daniel Sambursky David Zehavi i Nisim Nisimov, ke podesh eskuchar mezo el enlase, aki mas abasho.
Todos tres son grasiozos, ma a mi me tanye el korason solamente kon la muzika de Sambursky:
https://www.zemereshet.co.il/song.asp?id=1324
Trati oy, darvos aki mi traduksion libre al judeoespanyol de esta pekenya kantigaa:
Primavera, primavera mos vino,
el kampo se vistyo de vedre.
Todos ojos sorprendidos
de la muchidumbre de flora salvaje.
Sovre nos, espandido el sielo
en su vasto azul;
debasho – la mar, tan pasifika,
trankila komo un bebe.
I luz, mucha luz, briyante,
i silensio en el derredor;
arrelumbra de lustre i pureza
mundo ermozo, agradavle!
Semanada buena!
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
