eSefarad Noticias del Mundo Sefaradi
Ver todos los artículos de esta sección
EL RIKO I EL VENDEDOR DE GUEVOS
/ Kontado por Yehuda Hatsvi
Fue esto en un dia de feria en el merkado. Agrikultores de todos los kazales i aldeas del derredor de la sivdad, trusheron los rekoltes a vender.
Tambien kaminavan de butika a butika para merkar kozas por yevar en kaza.
Otros fueron a ver un chirko ke vino a la sivdad, espesialmente para este dia de feria.
Entre los vendedores ke apozavan aya i pregonavan en toda boz sovre la merkaderia,
avia i uno ke pozo un sesto djigante de guevos en sima de una siya, i gritava:
«Guevos freskos! Guevos baratos!»
Al lado de el, estuvo un otro vendedor ke vendiya gayinas. El gayinero (avicultor) parese ke fue su primera vez ke vino a esta feria. Ma el guevezero, no.
El ya konosia kaje a kada uno i uno ke aparesiya en la feria, i kontava a su vezino todo lo ke saviya sovre kada uno ke lo viyan pasar.
– A! mira aki. Este ombre ke ves, es un borrachon de prima klasa; i komer tambien le plaze mucho. En kada feria, el vyene i se merka kantidades enormas de komidas i beverajes.
El otro ke ves venir, (kontunea el guevezero), dizen ke es ladron, i ya paso un bien tiempo en la prizyon.»
Bueno, Mucho mas tadre de la manyana, aparesyo un ombre, bien vestido, paseandose avagar avager, kon trankilidad, entre lo magazenes i los vendedores embolantes ke en la feria.
– «Lo ves aneste»? Disho el vendedor de los guevos. «Ves a esta persona? este es muy muy riko. Rikisimo!!. Es el mas riko ke konosko. El se alevanta en oras tadres de la manyana, porke kada noche se va a otro balo. Lavorar no lavora. Para ke?
Ya tyene mabul de paras. Tyene mucha moneda, i muchos byenes. Te puedo dizir ke el tyene mas de 4000 de liras de oro!»
El vendedor de los guevos ayinda avlando por el riko, i na ke el riko se aserko verso la siya ke en sima de eya estava el sesto de guevos. El pie de este ombre se entrompeso, o talvez lo izo mahsus, kon intension. No se. Ma, el sesto kon todos los guevos kayo enbasho, i naturalmente,
muchos guevos se rompyeron, i se formo en la tierra komo un lodo blanko i amario de guevos rotos.
-«Guay de mi!» empeso a gritar el vendedor de guevos. «Ke me izites? Me rompites todos los guevos!» grito kon chiyos el guevezero.
– «bueno, bueno, kalmate» le disho el riko «Perdoname. Diskulpa. Yo te vo a pagar por el danyo ke te fize. Dime, kuantos guevos tiniyas en el sesto?».
– «Yo se? No se!!» disho el vendedor konyoros i gritos «Komo puedo saver? Komo puedo kontar todos los guevos ke teniya en el sesto. Avian muchas dozenas.
Yo se? Puede ser syenes de guevos!»
– «Ansina es?» se metio a riyir el riko, en alimpyando su kostum, su vestimyenta, muy repozadamente.
«Tu no saves kuantos guevos teniyas en el sesto, i no pudiyas kontar dozenas o syenes de guevos.
Komo, i de ande, es ke saves tan egzaktamente los byenes i el dinero ke poseso yo?
– En ke se le va la kandela del prove?
– En kontar kos bienes del riko…
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
