eSefarad Noticias del Mundo Sefaradi
Ver todos los artículos de esta sección
MELDA, MELDA !
Un dia de viernes salio Yeshaya, akel maestro viejo, al soko (merkado), a esmersar i merkar todo lo ke es menester para Shabat.
El merkado estava muy ruidozo.
Mucha djente sorreteavan ayi, aziendo kompras. Los vendedores en las tezias, i los vendedores ambulantes, proklamavan a boz muy alta sovre la merkansia ke ofresian a la venta.
Entre todas las bozes ke se sintian al derredor, sovresaliya la boz de un djoven, kaje un ninio. Este djoven gritava kon toda su fuersa i proklamava sin sesar:
– «Ende mi – todo barato! Merkando aki!
Barato del barato vendo yo!»
Esta boz del djoven le sono a Yeshaya muy konosida. El se aserko mas por aya, i, si, el rekonosio al manseviko, el ke antes unos kuantos anyos era uno de sus eleveos: un ninyo haylaz (perezoso/haragan), ke se niega a estudiar.
Eventualmente, este elevo avia abandonado sus estudios i desho la eskola por en medio.
– «Shalom, senyor maestro!» yamo el djoven i enshugo la sudor de su frente.
– «Shalom i Beraha, kerido Yitzhak» respondio el maestro. «Komo te tengo?»
– «Ah, no tan bueno! Es un servisio duro. De la manyana asta la tadre esto aparado al lado de la tezia, i mi dover es de anunsiar en boz alta, kon yugo i enerjia; na, komo ya lo avias sintido endagora».
– «Aman, ke pekado. Pekado!» disho el maestro kon tristeza. «Si meldavas ANTES kon yugo i enerjia, komo ansi, apenas te oyi gritando, no teniyas agora de gritar komo gritas»…
“Si dezeas mucho bivir, tienes ke meldar i eskrivir”
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
