eSefarad Noticias del Mundo Sefaradi
Ver todos los artículos de esta sección
En Erets Yisrael, pais de una klima subtrpokal, tenemos de vez en kuando anyos de sekia.
En el Telmud, topamos Maase (un kuento) sovre un Tana (Haham) yamado Honi, ke bivio aki en el primer siglo.
Este Honi, igual komo su padre i de su avuelo tambien, tuvo el merito de los sielos, ke su tefila (orasion) para tener luvias, era jeneralmente resivida kon veluntad.
Mos kontan por un anyo de sekia grave, en la kual yamaron a Honi ke roge al Dio por luvia.
Honi izo su orasion, ma no fue respondida.
Ke izo Honi?
Se apozo en un kampo, se rodeo a si mizmo en un sirkolo, i disho:
– “Senyor del mundo, no salgo de aki asta ke mos des luvia de los sielos!”
Empeso una luvia minuda a gotear.
En esto disho Honi:
– “No asi! Damos luvia ke incha a los kampos i asta a los pozos de agua!!”
Desbrocho una borra de luvia, una luvia furioza.
Honi pedrio de imediato su arrogansia, i paso a rogar i implorar kon suplikasion:
– “No ansi, patron del mundo. Por favor, por sedaka, damos luvias de veluntad, de beraha i karidad!” i ansi fue.
Ma, en la semana pasada en Israel, no tuvimos este mazal.
En interval de dos dias kayeron aki luvias komo 20% de la apropsimada kantidad anual jeneralmente.
Este raro fenomeno kavzo inondasiones en todos los vayes, torrentes i en las sivdades.
Malorozamente, aparte de los danyos ekonimikos, uvieron unos kuantos kavzos de muerte.
Por tal, no ay ni kompenso, ni remplaso.
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
