eSefarad Noticias del Mundo Sefaradi
Ver todos los artículos de esta sección
Keridos amigos,
El primer egzilo/exilio de muestro puevlo de su pais natal, es yamado “El egzilo de Asiria”, i tomo lugar en el anyo 733, antes del korriente kalendario sivil.
150 anyos despues, fueron los judios ekspulsados por los babilonyos, i despues, en el anyo 70, empeso el exilio mas masivo por mano del Imperio Romano.
Ma, durante toda la epoka de la Galut (exilio), de kaje 2300 anyos, bivieron siempre, (pokos o muchos), judios en Erets Yisrael.
Indemas, durante todo este largo periodo, judios, (pokos o muchos), bivieron en el pais, i otros mas izyeron Aliya i se instalaron aki, o, al menos tratavan de viajar a la Tierra Santa.
En 1946, el bibliografo Avraham Yaari ekrivio un livro (en ebreo) titolado “Viajes a Erets Yisrael”.
Entre todo el kontenido interesante del livro, se topa tambien una lista de viajadores al pais desde el siklo 12. De tala lista, ekstrayi i saki los nombres de los viajadores mas importantes, i tambien adjunti unas kuantas remarkas kurtas mias:
* Rabi Binyamin, ijo de Yona, de Tudela, en el anyo 1170 (antes mas de 100 anyos del ilustre viajor Marco Polo).
* Yehuda, ijo de Shelomo, Alharizi 1218 (poeta en ebreo i en espanyol. Nasido en Espania. Traduktor de los eskritos del RAMBAM.
* El RambaN 1267 (RambaN = Rabi Moshe Ben Nahman, konosido en el mundo komo Nahmanides; uno de los importantes hahamim de Espania, kabalista i mediko famozo).
* Rabi Eshtori ha-Parhi 1322 (Rabi Eshtori, ijo de Moshe ha-Parhi, nasido en Espania. Investigador de la flora i la vejetasion de Erets Yisrael; bivio unos kuantos anyos en la aldea de Bet-Shean).
* Rabi Meshulam de Voltera, Italia, 1481 (un savio, bankier, bivio en el periodo de la renesans, amigo de Lorenzo Medici el governador de Florensia).
* Rabi Yehuda Segal 1697 (yamado siempre kon el titolo/sovrenombre “Hasid”; nasido en Dubno, Polonia, en 1660. El kreo un movimiento de Aliya a Erets Yisrael. Mas de 1500 de su aderentes se instalaron aki, en Yerushalayim, Tevaria, Hevron i Safed).
* Rabi Hayim Yosef Azulay 1752 (konosido por el sovrenombre ha-Hi’da; eskrivio unos kuantos livros de Ley, bivio unos kuantos anyos en Erets Yisrael, i viajava en muchas komunidades judias en Evropa en favor de la komunidad judia en la Tierra Santa. Murio en Livorno).
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
