eSefarad Noticias del Mundo Sefaradi
Ver todos los artículos de esta sección
«Mashalikos» en judeo-espanyol (2)
Todos los autores de fabulas, en todos los tiempos, tomavan a los animales komo modelos en sus eskritos.
En el kuaderno de YYY topamos tres refranes ke no son en favor de los gatos:
- La karne buena se la yeva el gato.
- Kien se echa kon gatos se alevanta arreskunyado.
- Yamimos al gato por ayuda, avriyo los ojos i mos espanto.
Al kontrario, ay un refran ke mos konseja ansi: «Mano de gato su ayuda es».
(Kon esta kontradiksion, vos demando yo agora: Es verdad lo ke mos dizen ke «Refran mentirozo no ay»?)
En unos de los refranes adjunto YYY algun komentario interesante, (en ebreo), komo – por enshemplo- en la dicha: «Marido en kaza, dolor de keshada».
Aki vos do mi traduksion a lo ke mos konta Yitzhak Yehezkel Yehuda:
«»»Abu al Aswad al-Du’ali (el era el primer filologo ke kompozo las reglas de la gramatika i la puntuasion en la lengua araba; en la epoka del kalifato de Ali ibn Abi-Taleb, el era el komiser de la sivdad de Basra, i una persona muy rika).
Afilu en su vejes, uzava Abu al-Aswad a salir kada dia de su kaza i sorretear por las kayes i en la plasa (sokos, merkados).
Sus amigos le dizian:
– «Porke sales de en kaza, dia por dia, indote de aki por ayi en vano, i kuando tornas, ya estas kanso kansado i deskorrido. No sera mijor ke te kedes en tu lugar en repozo?»
Abu al-Aswad les respondia:
– «Mirando aki, agora kuando salgo i torno, mi djente tienen algo de avlar por mi:
«Na, ya salyo el senyor; na, ya torno el senyor». Ma, si me kedo siempre en kaza, afilu si viene la oveja a verter aguas sovre mi, no avra kien se okupara de mi o gritar algun «kish» a la oveja»»».
A kontinuar…
Yehuda Hatsvi
Erets Yisrael
————————————————
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
