La boz de Yehuda: Doktorados de Onor en la Universidad de Bar-Ilan

En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.

Doktorados de Onor en la Universidad de Bar-Ilan

En la tadre del martes pasado tuvo lugar en la Universidad de Bar-Ilan una seremonia muy impresionante (i artistikamente organizada), de konseder «Doktorados de Onor» a ocho personajes importantes, entre eyos muestro Selim Salti, el fondador del Sentro Ladino al nombre de Selim i Naime Salti.

Este sentro ladino en la Universidad de Bar Ilan es oy el mas grande i el mas aktivo sentro en favor de muestra lingua i kultura sefaradi.

En la invitasion a la seremonia en la Universidad no avia eskrito ni una palavra sovre el lugar de parke. Komo uno ke konose «al fondo» la estrechura de aparkamiento en Tel Aviv, de verdad ke ya estuve un poko en kuydado. Ma, a mi sorpreza, los tablos i las flechas mos giaron a un terreno grande i espasiozo de «parking».

Unos kuantos pasos de aya i na ke entrimos a un anfiteatro ermozo al estilo romano, kon la diferensia ke aki, sovre las linyas de piedra, pozaron asientos konfortables echos de plastiko de kolor blu, i sovre kada asiento mos esperava una redomika/bokalio de agua mineral. La kolor azul de las redomas, djuntos kon el blu sovresaliente de los plastikos, di ke paresiya (kon un pokito de imajinasion) ke estavamos rodeados de las ondas de la mar.

De mi para mi me izo akodrar ke desde mi chikez, en el movimiento de djoventud, asta mi servisio militar, en tiempos pasados en Erets Yisrael, se uzava una «disiplina de agua». Oy en dia -al kontrario- la djente en las sivdades de este pais kaminan kon un bokal de agua en la mano (i a vezes el telefon selular en la otra mano, apegada al oyido).

Abasho, en el sentro, mas atras de la shena ancha, se instalo la Orkestra Filarmonika de Israel. No vos konto el numero de los muzikantes. Ainara ke no les apoze.

Tengo de dizirvos ke el mueven «personaje» ke fue premiado en akea tadre komo «Dokdorado de Onor» fue esta mizma Orkestra, fondada en 1936, konosida i rekonosida oy en todo el mundo. Despues de su primer konserto (en Tel Aviv, 1936), disho el maestro Arturo Toscanini: «Esta es la mas ekstaordinaria orkestra en el lugar mas ekstraordinario del mundo».

A la ora kaje presiza empeso la seremonia en una «parada akademika» akompaniada kon la muzika alerta i alegre de la Orkestra. La parada (inkluye profesores, investigadores, direktores, etc,) pasava en la shena, enkorajada por los fuertes aplauzos de parte del publiko, todos en pies.

Por ultimo de la parada (ultimo, pero -me parese- no menos importante) entraron los kandidates del premio: Selim Yehoshua Salti, Prof. Dan Shechtman, Mario Moshe Levy, Prof. Edward C. Prescott, Morris Kahn, Efraim Halevy, Susanne Czuker, Shmuel Atzmon-Wircer, i Yigal Tuneh (el reprezentante de la Orkestra en esta seremonia).

Antes de otorgar la dekorasion de «doktorado»,  El rektor de la Universidad, el Prof. Hayim Teitelbaum, en un diskorso kurto se adreso a los nominados para «Honoris Causa», i disho:

«»En Pirke Avot meldamos:

Kual este savio? – el ke aprende de todo ombre
Kual este riko? – el ke se alegra kon su parte
Kual este el onrado? – el ke onra a las kriansas/las personas.

Entonses, entre vozotros ay savios i rikos, pero oy resivish
muestra gratitud i respekto porke eres todos jenerozos a
partajar de vuestra saviduria i kontribuir de vuestra fortuna a la djente
i la sosiedad en jeneral !»

***

El Prof. Moshe Kaveh, el presidente de la Universidad en los ultimos 18 anyos, yamo uno por uno a los nominados, i por kada uno de eyos mos prezentaron un breve filmo de algunos tres minutos, deskriviendo las ovras i las aktividades benefisiozas de kada uno.

Siendo ke el Sr. Salti fue el primer en la lista, no tuvimos ke esperar impasientes por mucho tiempo.

Me gusto oyir al Prof. kaveh kuando yamo al nominado, kon un tono de karinyo: «Mi amigo Selim Salti !».

Tres personajes se aserkaron para akompaniar a Selim al sentro de la shena,i dekorarlo kon la «mitra akademika:

a) La Sra. Naime Salti,

b) El Prof Shmuel Refael, el shefe del Sentro Ladino en la Universidad

c) Dr. Mordehay Katz, shefe de la djunta direktiva de Bar-Ilan

———————————————————————————————–

Yehuda Hatsvi
Erets Yisrael
Para Ladinokomunita