eSefarad Noticias del Mundo Sefaradi
Ver todos los artículos de esta sección
Animales en la Biblia (3)
En la Biblia se nombran unos kuantos animales salvajes ke ya no egzisten mas en Erets Yisrael. Uno de estos animales es el lonso.
El lonso es un animal grande i pezgado i, ke por ser ansi, es un kasador torpe, i se akontenta tambien en todo lo ke topa en el kamino, komo yervas, frutas, guevos, i afilu miel.
Jeneralmente, el lonso no ataka al benadam, ma kuando por kualker razon esta asustado, el es el mas peligrozo de kualker otro animal salvaje.
El lonso es «renomado» por su suenyo luengo durante el invierno. Este fenomeno se yama en varyas lenguas
«hibernation» o «Hibernacion». Dunke, el lonso (ma tambien i otros animales) es kapaz de adaptarse a un estado de inaktividad i de una moderasion del ritmo del metabolizmo. Todo esto, para sovrebivir las kondisiones duras de la klima de invierno i de manknsa de komania (komidas, etc.).
En el prefixo «Hiberna» podemos notar su semejansa a la palavra «invierno»
En el livro de Mishle (17, 12) topamos el pasuk: «Mijor es enkontrarse kon una lonsa desijada, i no un nesyo
kon su lokura» Otro pasuk en Mishle (28, 15) aze una komparasion entre un mal governador i un lonso ambriento.
En el livro de Shemuel (kapitolo 17) meldamos por David, ijo de Yishay, tratando de konvenser al rey Shaul ke lo mande (a David) a gerrear kontra el djigante Goliat el filisteo.
«I disho David a Shaul: Tu siervo era pastor de las ovejas de su padre, i kuando veniya un leon o un lonso, i levantava un karnero del revanyo, yo saliya detras de el, i lo feriya, i lo liberava de su boka».
Yo, de mi parte, asta oy me pregunto, komo podria ser el rey Shaul konvensido tan fasil solamente en oyendo la istoria de David? Oy, en Israel, por obtener afilu un posto simple komo un moso de bakal, tienes de prezentar sertifikados de estudios i de experiensa, komo tambien alguna letra de rekomendasion.
En otro livro de la Biblia (Reyes II, kapitolo 2) meldamos por Elisha el profeta ke suvyo de Jeriho a la sivdad de Bet-El; «i suviendo por el kamino, salieron unos muchachikos de la sivdad, i se burlavan de el, i le diziyan: ‘suve, kalvo, suve, kalvo!’ i miro atras i los vido, i los maldisho, I salieron dos lonsas de la shara (boske), i despedasaron de eyos kuarenta i dos ninios».
Mucho penaron muestros savios en el Talmud (Masehet Sota 47), a eksplikar este relato terrivle. En mi opinion, no reusheron tanto. Entre las diskusiones sovre esto, disho un haham ke aki okurrio solo un milagro, i es ka las lonsas salieron del boske. Otro haham dyo su idea ke Elisha el profeta tuvo aki dopio (doble) milagro: «(no avian aya) ni lonsos ni boske». En ebreo mos kedo esta ekspresion para dizir: «Nada de esto» o «Nunka okurrio».
La unika koza ke me afalago un poko fue la konkluzion de los savios: «Elisha fue kastigado a sufrir tres hazinuras. Una de eyas fue por kavzo ke maldisho a los ninios».
Es kuriozo ke entre muestros ermanos ashkenazim tienen nombres komo Ze’ev (lovo), Dov (lonso), i Arie (Leon). Los Sefaradim se «akontentan» solamente kon el Leon.
Yehuda Hatsvi
Erets Yisrael
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
Ekselente historia que nos comparte muestro kerido amigo Yehuda Hatsvi, que el Altisimo kontinue dándole esa grandiosa sabiduría para kompartir con todos nosotros.