En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.

«Amsterdam, Desembre 1636»

Micky Weisses uno de los «aktores» (o faktores) veteranos en el merkado de finansia en Israel. Ma, aparte de sus negosyos, es bien konosido komo author de kuatro livros: uno en el kampo de la ekonomia; los otros son novelas de misterio i aventuras.

Su sinken livro (en ebreo), ke agora salyo a luz, se yama «Lis’hor ba-ruah» («Komersio en el viento»).

Los evenimientos en el livro okurren en Amsterdam de la metad del siglo 17.

Komo ya lo savemos de la estoria, 100 anyos despues de la ekspulsion de Espania, empesaron imigrar a Amsterdam los desendientes de los konversos de Espania i de Portugal, ma tambien arrivaron muchos judyos i konversos de Fransia i de Antwerpen.

En el ambiente liberal ke egzistiya en Holanda, pudieron los konversos tornar aviertamente al judaismo i konstruir aya una komunidad judia prosperante, ke kontava mas de 3000 almas.

En akea epoka, Holanda gerreva kontra Espania («la gerra de 80 anyos»), asi ke los judyos, venidos de la peninsula iberica, preferieron yamarsen «la komunidad portugueza».

El livro de Micky Weiss mos konta sovre la panika de «tulipmania», el komercho muy alerto de bulbos de tulipes. Proves komo rikos estavan negosiando en esto, i la moneda korria komo las aguas del rio Amstel ke traversa la sivdad de Amsterdam.

Un obispo katoliko, kon su dezeo obsesivo de enternizasion, enkomendo ande Rembrandt, el famozo pintor, dos pinturas de su retrato. Dos pinturas diferentes la una de la otra.

Para finansar el salario bien alto de este renomado pintor – el obispo (kon la ayuda de un judio de la sivdad) indjenio un komploto bien sofistikado ke su buto era de influir en los presios de los bulbos i ganarse una fortuna (enormes ganansias).

Reushira el obispo kon su komploto? Sera ke su ambision kavzara un dezastre en todo el pais? i kien es el ke sera kastigao: el obispo, o (una vez mas) el judyo?

Lo ke vos puedo deskuvrir es ke un poko de este misterio fue soltado resientemente durante una vijita en el Rijksmuseum (en Amsterdam).

Me alegro kontravos tambien, ke en la ultima pajina de su livro, Micky no se olvido de agradeserme por mis eksplikasiones sovre  la lingua i el jargon de los jidios de Espania i de Portugal en akea epoka.

Yehuda Hatsvi
Erets Yisrael

Fuente: Ladinokomunita