eSefarad Noticias del Mundo Sefaradi
Ver todos los artículos de esta sección
En estos dias meldi un muevo livro “Agada Sefaradit” (“Una lejenda sefaradita”). El livriko esta destinado para ninyos, ma kualker adulto es kombidado a meldarlo. Yo lo meldi kon gozo, fasinado komo un ninyo.
La autora del livro es Zehava Chen-Turiel ke su eskritura es maraviyoza, sea para ninyos i adultos, igualmente. Admiro a notar, ke todos sus eskritos, inkluye este rezin nasido, son empapados de la istoria i la kultura de los ladinoavlantes.
Me emosioni tambien ver i meldar, una i dos vezes, la traduksion del livro al ladino, una libre traduksion echa por Sara Sufrin-Baruch; traduksion i edision por Medi Malki-Cohen.
Las ermozas ilustrasiones de Maya Uziel, tambien mos azen komo tornar a muestros dias de la chikez.
Indemas, mis aplausos i grasias a la Autoridad Nasionala del Ladino i su Kultura por apoyar la publikasion del livro.
Semanada buena!
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
