LA AZKARA DE NISIM BENBANASTE

El12 Tamuz 5770  Djugueves komemorimos  la  espartisyon de Nisim  Benbanaste { A’A’ },  atras 18 anyos  de entre nozotros por irse a su eterno repozo en Gan-Eden. Nos  konosimos  kon el  defonto en 1959 en  una  lisyon de Gimara en la Keila de Keneset Yisrael.
 
El estava  kayadiko en  un kanton de la sala, komo si fuera un sirvidor de beverajes kaentes. Me disheron ke el era el braso  derecho  de Ribi Nisim Behar {A’A’}.   

Este  renkontro  fue el atadijo  entre   nozotros.  Kuando  nos enkontravamos, nuestra konversasyon turava a lo  manko medya  ora.  Syempre el  sujeto era seryozo i muncho profito  tuve de sus avlas.

Los anyos pasaron  i un dia  me  kontaron ke esta dezrepozado  i se topa en el hospital. Tenia amigavle kon los mijores profesores i fue  mirado kon grande  kudyo.  Oyi  ke el vino al hospital djudyo. Le telefoni i le demandi si puedo renderle  una  vijita.  Me respondyo ke el ya  estava para bushkarme i me rogo  de  vinir lo mas presto posivle. 

Me  fui de  vista. Le demandi   porke el se espartyo de el hospital  ande estava,  visto  ke ayi  se topavan grandes spesyalistos de su dezrepozo. Me  respondyo, ke el ya vino  a el kavo de el kamino i espantandose no sea ke en  su  muerte  le tomen kualker myembro de su kuerpo.  

El dezeyava tornar a  Su Kriador  a sigun  fue kriado.  Lo ke me  yamo fue por rogarme  de  kumplir  en su espartimiento, los  deveres de al kavo, komo Rehitsa, Kevura etc.    Le avli ke  no sea pesimisto ke el ganara su sanedad i bivera una  vida larga.

Todo en savyendo  su maldicha hazinura, ansi me kayiya  avlarle.  Le dishe  ke va vinir a vijitarlo i espero  toparlo en estado  mijor.   Malhorozamente fue  nuestro   enkontro de alkavo. Grasyas a el  Kriador, ya   peni a azer todo  lo ke me  demando. 
 
Nisim  Benbanaste era  savido a las kayades i  tenia una  pendola ke eskrivia  las verdades a sigun  son. Eskrivio dos  livros:
 
1- ATATÜRK    Bir  Dehan?n  analizi
2-Örneklerle  TÜRK- MUSEV?  BASININ IN  TAR?HÇES? 
 
I kolaboro en  los semanales  Shalom  i   La Vera Luz.
 
Era el Darhshan  renomado de la Keila de  los Frankos-Italianos. El  fue el primer a dar  la  idea de fyestar  el  aniversario de  500 anyos de  el   Gerush Sefarad i el  resivo de los Cudyos por  el Emperyo Otomano.

Por regreto se afirmo el refran: Leshos de los ojos leshos de el  korason. El uniko semanal  ke  nos  kedo no vido menester de  akodrar su azkara.   De el   dia  ke  nos desho  la  buena vida, su ermano  sinyor Daniel  Benbanaste me  kargo de  azer el meldado i meldar  una  Mishna  i  la  Idara, lo  ke  kada anyo. Grazyas  a El  Kriador ayegi a reuchir.
 
Este anyo la Azkara se izo en  el Azilyo de  los  Aedados onde asistieron  amigos  i  konosidos  djudyos  i de  otras kreensas.
 
En la seuda  ke se dyo ala fin de la Azkara tomo la palavra el sinyor EROL  YALC?NKAYA i avlo kon grande elokensa  por la  pyedrita de Nisim  Benbanaste (A’A’)  por sus kualidades i sus ovras i la pena   ke   resintimos de  su mankura.

Shelomo Ameleh en Mishle dize : “YEALELHA  ZAR VELO  P?HA”
“Ke te alave el ekstranjero i no  tu boka.”

Los savyos dan otra eksplikasyon.
“Ke te alave el ekstranjero:  si no? tu  boka.  Vyendo ke aki en su pais no uvo ken tenga  kudyo de eskrivirlo,  pensi  ke seria en su lugar de  avizarlo entre nuestros ermanos de  otro pais.

Rogo de El Kriador ke  las sufriensas  ke tuvo le sean perdonansa de sus pekados -si  tuvo-, i  ke repoze su alma en Gan-Eden .   
AMEN.

MOSHE  SHEMUEL  PALACCI