eSefarad Noticias del Mundo Sefaradi
Keridos amigos i amigas,
En el JEWISH NEWS de esta semana «Jenni Frazer» presento un artikolo tratando de la Primera Komunidad Judia establesida en un pais Arabo.
El Gran Rabino «Yehuda Sarna» tiene kozas a dizir. En este momento esta asperando ke venga el invierno para ke tenga la Mikva en la Sinagoga «Ben Maimon» para pueder operar. Forma parte del komplex ke se yama «Abrahamic Family House».
El rabino tiene 45 anyos i un otro rolo ke djuga es ser el Gran Rabino del Konsillio Judio de los Emirates estableaido en 2019.
Nasido en Montreal, ensenya en la Universidad de New York en mismo tiempo.
Desde 2020 se nota un kresimiento en la Presensia Judia en Dubai ande sus aktividades eran sekretas antes i ke oy son kompletamente aviertas.
La sinagoga se topa en el sentro de la sivdad, en un kompex kompartido kon una iglesia i meshkita.
En New York, los estudiantes Musulmanes le rogaron ke les ayude a kombatir Islamofobia komo se aze kon el Antisemitismo. En 9/11 el formo una amistad kon el ‘Imam Khalid Latif» i servio tambien 2 vezes komo Chaplain, antes de azer una vijita a los Emirates en 2010. En 2016, oyo ke avia una Komunidad Judia en Dubai i se metio a ayudarlos komo puedia. 3 anyos despues, el Konsillio judio se establesio en los Emirates, enkontrandose en las villas. Bivian ayi 1000 Judios, Oy el numero se izo el triple i 75% biven i lavoran en Dubai.
Para el fue siempre kestion komo topar el kamino djusto para estableser la komunidad. Seria sentralizada o desentralizada?
Kon el Akordo Abrahamiko, empesaron a vinir los Turistos de Israel, se vido ke serian desentralizados kon oteles i restorantes kasher para resivir a los Sefaradim i Ashkenazim. Antes de esto, todo era privado i kalmo. En supito se troko todo. El rabino espera ke esta tentativa formara parte de la edukasion para los ke no son Judios.
El anio 2019 fue desinyado komo «Year of Tolerance» i la komunidad Judia le dio la Tora al «Sheikh Zayid» komo un regalo, ke oy es el Presidente «Mohammed bin Zayid» ke anunsio a esta kaza komo un projekto formal. En Febrero 16, la Sinagoga Maimon fue konsakrada i vinieron ayi 350 personas. El primero era el arkitekto «Sir David Adjaye» kon sus kriaturas. Estava mirando al puevlo para ver sus reaksiones. La fuente de inspirasion era la Suka i el viaje a traves el dezierto. Topar un lugar de deskanso, Se topa ayi un sementerio en nasimiento.
Pokos Judios tienen la nasionalidad del pais.
Otro projekto es ensenyar el Olokosto en las eskolas. porke la famiya de su mujer fue salvada en Berlin por un doktor Arabo.
Ay muncho de azer aki ande 1000 flores enfloresen. Dirijir una sinagoga no es tan facsl. Felisita el Leadership de UAE por tener el koraje.
Trezladado por Simon Geron de Sydney
Fuente: Ladinokomunita
