Kuba: Don Isaac de Sosa por Miriam Antonieta Alexandra Acosta Sosa

En ladino/judeo-espanyol

Lo ke se de mis antepasados lo se por dokumentos ke tenia mi famiya i por kozas ke me kontava mi granpapá maternal. Rekuedro  ke me kontava istorias en una lengua ke se paresia a lo ke yo me estava ambezando en la eskola…. Ma no era de mezmo. Esta lengua (Ladino) teniya un kanto propio ke me azia maravillar.
 
Mi avuelo i yo meldavamos Torah i kantábamos romanses sefaradíes. El me kontava ke un tal Don Isaac de Sosa ( kon raises en Kordova desde el anyo 1318) yegó a Kuba desde Espanta en la sigunda parte del sieklo XVI (mil i kinientos i sesenta mas o menos, no mi rekodro eksaktamente), se asentó en “Camaguey” i merkó esklavos pretos komo era koza de esa época… i les dio la libertad!

Parese, Don Isaac no disho nada sovre sus kreyensias relijiozas, i kuando ayegó la Inkisision a las Amerikas, los governadores, ke tenian muy poka djiente edukada para los lavoros administrativos de kada diya mizmo tampoko demandaron, indemás, el sujeto del diya era konvertir “indios» i kitarles el oro.

Nunka fuimos konversos (Anusim), solo “criptos” (kriptodjudios), ma asta sierto punto. Komo ya dishe, en Kuba avia “santeria”, “bembés”, “masonería”, “testigos de Jehová”… ansí ke yevar chapeo en todo momento, asta bajo techo, no komer algunas kozas i no lavorar en Shabbat no era koza de yamar muncho la atansión… ma mis antepasados mizmo tampoko izieron muestra de sus kostumbres.
 
Tornando a Don Isaac i sus “esklavos”. Los esklavos no fueron ovligados a trokar al djudaizmo, fue koza ke eskojieron livremente porke el djudaizmo era mas liviano ke lo ke ovligava el katolisizmo kon esa amenasa de «fuego eterno», rekodrar lo ke sufrio “el nazareno” i mas. Amás, teniyan un diya livre, mientras ke otros esklavos lavoraban todos los diyas. Esto de no ovligar a trokar de relijion lo se yo porke los esklavos, a kenes Don Isaac ambezó a leer i eskrivir, firmaron palavras de karinyo endjunto kon la Karta de Liverasion  i tomaron la alkunya “de Sosa” ke era la de su patron.
 
Malorozamente, kuanto skapamos de Kuba, no pudimos yevar ningun dokumento, avlamos kon la kapo del komité “Defensa de la Revolución” (grupo kriado por Fidel Castro para lavoros de vijilansia kolektiva), ke era muestra vizina, i se engrandesió muncho kon muestra salida de Kuba (su marido “eredó” mas de sien kostumes de mi padre, i eya una makina de koser, television, i mas) mos dijo ke estavamos “markados” i mejor no tentar al mazal. Komo dishe, todos esos dokumentos kedaron en Kuba, i asigun mos informaron, fueron kemados kon muncha pompa. El resto ya es historia. 
 
A proposito, yo so BASTANTE morenika i a munchos les sorprende ke sea djudia.

Miriam Antonieta
Alexandra Acosta-Sosa