eSefarad Noticias del Mundo Sefaradi
KUALO ES LA “HOMEOPATIA” ?
Selim Amado
Una persona enteramente sana entra a la kuzina para azer salata. Toma la sevoya, empesa a kortarla. Despues de muy poko tiempo, empesan sus ojos a lagrimear, empesa a sarnudar, la nariz a korrer, etc. Situasion no agradavle ke pasa fasilmente en lavando la kara. Ma kualo es lo ke se paso ? Las vapores del sumo de la sevoya le iritaron ( las mukozas) de los ojos i de la nariz, uvo una chika intoksikasion ( o iritasyon) , akeya persona sana tuvo sinyos de desrepozo porke korto la sevoya (!).
Una otra persona esta abashementada, la nariz le korre, sarnuda, los ojos kolorados. Se va al terapisto de Homeopatia. Ke medisina (kura) le va dar? : Allium Cepa, ke es el nombre latino de la sevoya, ma en forma diluida. Diluida kere dizir muy flosha, I esta dilusion de sevoya izo ke el kuerpo aronce (!) a los simptomes kavzados por el resfrio, ke paresian a la intoksikasion de la persona sana por las vapores de la sevoya.
Antes muncho de la Homeopatia, el famozo medico Hipokrates el Grego avia dicho : “Los paresidos son kurados por los paresidos” o en fransez, “les semblables sont gueris par les semblables. Esto se yama la “Ley de la Similitud”. Kuala es la orijin del biervo? En Grego, “homeo” kere dizir paresido, i “pathos” es hazinura o sufriensa.
Este es el prinsipio : un produkto ke aze danio a la persona sana i kavza en el simptomes de hazinura, akel mezmo tosigo diluido munchas vezes, sierve a kurar simptomes paresidos en la persona inferma. (La dilusion se aze segun una teknika espesiala ke karga una enerjiya, yamada dinamizasyon)
El fondador de la Homeopatia es un doctor Alman yamado Samuel Hahneman, ( nasido 1755), ke desidio de deshar la praktika de la medisina, porke viya ke las kuras konvensionalas ke tenia en la mano, de una parte ayudavan –o no – ma azian tambien danio. El keria kurar al infermo, sin darle medikamento fuerte ke tendria reaksiones non dezeyadas o le izyera danio. Despues ke Hahneman desho la medicina i empeso azer traduksiones de tekstos medikales para ganar su vida, el meldo una observasion: Akeya kashkara de quinquina (Kına kına en Turko), tomada en poka doza, o akeyos ke van a lavorar entre los arvoles de la quinquina, eyos mezmos vienen a kaza kon frissones (titirmas) komo si tuvieran sisyones o paludismo (sısma hastalığı) i kon fievre. Lo kere dizir ke eyos se intoksikavan de polvo ke respiravan. Haneman tuvo la idea ke al lugar de tratar el paludismo (sisyones) kon dozas altas de kinina (ke tiene munchos effektos segundarios) se podia obtener el mezmo rezultado kon dozas muy chikas de quinquina.
El kontinuo a eksperimentar a diversos produktos vejetales, minerales o animales para ver kualos simptomes de intoksikasion tienen, I empeso a kurar kon estos tosigos ke en diluandosen muncho no tenian mas elpoder de intoksikar, segun ke de kurar al hazino. Lo ke se puede komparar a la vaksinasyon, ke es dar a la persona sana microbes muertos ke no azen danio para ke el kuerpo produska anti-korpes de defensia. Si el (Aloe) kavzava la diarrea en doza alta, el kuro la diarrea kon dozas muy muy chikas de Aloe. Si la (Ipeca) kavzava vomito, el kuro el vomito kon la Ipeca diluida.
Despues de Hahneman sus elevos fondaron la homeopatia en los Estados Unidos verso la fin de 1800, en ganando rekognision por el sukseso ke obtuvieron en tratando epidemias komo cholera, tifo, sarampion, sisyones, etc.
Kualos son los aventajes de la Homeopatia?
Prima ke es una medicina “personalizada”. El Homeopat toma en konsiderasion no solo los simptomes de la sufriensa, ma el karakter I la konstitusion de la persona, I las kondisiones ke azen ke la sufriensa es mas poka o mas grande, par egzemplo entre el dia I la noche, el frio o la kalor, en movimiento o en repozo, ke forma de vida tiene, en ke atmosfera bive. Una persona de humor alegre I uno de karakter pesimisto, una persona kalma o inyervoza, un godro kon un flako mezmo ke tienen los mezmos simptomes, diremos dolor de kavesa, no van a salir del doctor homeopat kon la mezma kura.
La homeopatia trata la infermedad en ayudando, en estimulando el kuerpo de arondjar a la infermedad. Ansi es ke no te dan –komo en la medisina konvensional, o “allopatia”, Aspirina o Paracetamol para bashar la fievre, ke es un sinyo de defensa del organizmo, te dan milizinas homeopatikas a baza de produktos vejetales muy diluidos (komo Aconit, Belladonna, Ferrum Phos.,Bryonia, Gelsemium, etc) sigun la altor, la variabilidad (arriva o abasho) i kuanto tiempo kontinua la fievre. Ekzisten tambien produktos de baza animala o minerala, o mezmo komidas komo chocolate ke sierven a preparar dilusiones homeopatikas.
La homeopatia emplea kuantidades infinitezimalas de produkto ( proviniendo dilusiones muy grandes, komo 1 en 1 million, 1 en 10 milyones etc.) lo ke rezulta es ke no ay ni toksisidad, ni efektos segundarios non-dezeyados. Estas dilusiones no sin matematikas, si non ke se azen kon una teknika de dilusion I dinamizasion.
Los medikamentos homeopatikos pueden ser en likido (gottas, siropes) , o en granulos chikos o grandes, o tabletas, para ser dezechos en la boka: porke la absorbsion del medikamento se aze muncho mijor en la boka ke el estomago. Ay tambien injeksiones, gotas de ojos, de nariz, de oyidos, I unguentes.
Un medikamento homeopatiko puede kontener un solo elemento aktivo ( Homeopatia klasika), komo tambien unos kuantos en djunto, ke djuntos kovren diversos simptomes a la baza de la sufriensa.
Ekzisten en el mundo entero fabrikas importantes de espesialidades homeopatikas, donde las mas konozidas son en Fransia Boiron, Dolisos, en Alemania Reckeweg, Heel. La homeopatia es muy popular en siertos payises de Evropa, en India, en Brazil, en munchos payses se esta espandiendo, I en algunos, komo la Turkiya, no es tan konosida.
Kualas son las kritikas a la Homeopatia?
En la sensia pozitiva, kada produkto I kada efekto kalen ke puedan ser mezurados: en Homeopatia la kuantidad de produkto aktiva no pueden praktikamente ser mezurados: no ekziste metodo de mezurar 1 en 100 milyardes. En Homeopatiya no es fasil de azer estatistikas, por ke el tratamiento es individual. Ma mezmo kon esto, estan echos lavoros sientifikos de mas en mas, para provar la efikasidad objektiva de los medikamentos, I eskojer el medikamento se baza sovre la observasion de simptomes I muncho menos kon analizes medikales, o roentgen, o CT. Nunka la Homeopatia tomara el lugar del antibiotiko, del tratamiento urjente en kaza de problemas de korason.
La efikasidad ? La homeopatia tiene una historia de 250 anios, miles de personas fueron konsejadas I kuradas por la Homeopatia. Todos los dias la djente emplean para sus problemas de kada dia espesialidades homeopatikas, para resfrio, para tos, para ronkedad, para aksidentes, antes o despues las operasiones, aftas en la boka. Por seguro ke la Homeopatia no siempre reushe, kom en allopatia (medisina konvensional) no todo kura. No todos los ke tienen problemas psikolojikos tienen ke ser tratados por la psikiatriya, ay posibildad de ayudarlo por la homeopatia. Lo ke aze la Arnica en tabletas o en unguente despues de un aksidente, no kreyo ke ay paralelo en la medisina konvensional .
En konkluzion lo ke se puede dizir es : La Homeopatia no viene al lugar de la medisina konvensionala. El doctor, el hospital, los analizes, los aparatos modernos de diagnoza, el ECG, el EEG, el Ultrasound, el CT, el MRI no tienen ningun alternativa. Ma lo ke se yama “sufriensa”, “infermedad” no son solo kavzos ekstremos. Tenemos tos, mos duele aki o aya, estamos kon abashada, tenemos indigestion, estamos un poko “kon inyervos”, o tuvimos un aksidente sin konsekuensas graves, kon un sierto espanto. En kavzos akutos ( ke aparesieron en diuna) la homeopatia mos permete de kurarmos sin ayudo de profesionales.
El Homeopat mos puede ayudar en kavzos mas seriozos de problemas kronikos de respirasion, de kuero, etc. sin tomar kortizon o medikamentos kon munchos efektos segundarios o interaksiones kon otros medikamentos.
Por esto es e ay ke konoser a la Homeopatia.
R45 Hoarseness formula*
Active ingredients: Argentum nitricum (Silver nitrate) 12X, Arnica montana (Mountain arnica) 30X, Arum maculatum (Common arum) 12X, Calcarea carbonica (Impure calcium carbonate) 30X, Phosphorus (Yellow phosphorus) 30X. Inactive ingredients: 38 vol.-% alcohol, distilled water.
Indications: Homeopathic Medicine for the temporary relief of minor symptoms associated with*:
• Discomfort associated with a sore throat
