Konsejika: "Myriam en el kasino" por Myriam Cuneo

El enverano ainda no terminava, sigiamos en muestra kaza de Piriápolis en la kosta de Maldonado ke el avuelo metio «Villa Myriam» por modo de mi.

Ya vinieron los paketes de Matzá, de ke Pesaj está viniendo.  Ya savesh las minas de kezo, de jandrayo, de vedrura toda esa jadra es el galut i la avuela Sasbona, las tyas i mamá se metieron, a trashkear, alimpiar todo ande yo ke so alergika me tengo ke fuir.

El avuelo Bojor, ke es mi amigo , sempre viene a tomarme la mano i yevarme a kaminar devagariko, por la Rambla, agora dize : te vo a yevar a konoser mis amigo i el kasino.

Me meten un fostaniko blanko, una chapeo de algodon, i ya sento mi manika agarada por este sinyor grande.  Kaminimos muchas kayes, los amigos le dizen «komo sta don Alejandro, ma yo me demando de kualo le dizen ansina si el es avuelo Bojor?

Mos vamos hasta el Hotel Argentino, suvimos las eskalinatas grandes i ya estamos en el Bar del hotel, ande me asienta en una siya i el enfrente de mi, me dize agora vas a ver kualo es «Merkar una siya» …viene el garson i le dize «buenas noches Don Alejandro komo está?»   el avuelo responde «trushe a mi inietizika,  a eya le traes una naranja kon chips i a mi un wiskiziko kon unas azeitunas.»

Kuando mos trae todo esto el me embeza komo agarrar los vasos kon delikatesse i komer sin bruido.  Dempues le paga i desha una grande propina.

Me amostra las salas de jugar Baccarat, rulette, i una kavayikos.  El juga dos pesos, mentres yo miro de fuera i ya mos vamos a kaza .

Yo tengo no mas de tres, o kuatro anyikos i me sento kon un sinyor ke me havla komo si yo fuera grande kon gran respekt, me konta kosas i esnseya a jugar poker.

 
Myriam Cuneo, (inyeta de Izmirlis)