eSefarad Noticias del Mundo Sefaradi
Meldar todos los artíkolos de esta seksión
LA TEMOR
Rogava del kuerpo
ke no me entrege
i de la alma
ke no me ensere,
ah, de las manos
ke de temblar dejen
i de los piezes
ke no se enpiedren.
Kom’un rey detronado,
komo duenyo desterrado,
o patron – ya dezeridado,
esto gritando en el dizierte:
¿es ke tan fuerte es
el espanto de la muerte?
Ah, tu, miedo menospresiante,
i tu, temor uzurpante,
vos enreinatesh en mi lugar,
faziendo de mi kaza vuestro ogar
i de mi skiptro vuestro palo.
No konosesh otra le ke vida
ni otra pasion ke la de ser,
ideolojias, ideas, ideales
vos interesan komo el rosio d’ayer.
Vos plaze la vida,
la vida por sí,
sin mucha filosofía
y sin ningunos tenaim.
Ke se va fazer de eya o kon eya
sovrepasa vuestro santo intereso.
Ke avra vida, ke no se depiedra,
no importa kualo se fara kon eya.
sebat 5763
Eliezer Papo
Eliezer Papo es nasido en Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E
