eSefarad Noticias del Mundo Sefaradi
Keridos amigos i amigas:
En el Jewish News de esta semana avia un artikulo presentado por el Rabino Fred Morgan tratando del aspekto del tiempo ke tiene una koneksion kon el kalendario i la istoria Judia. En el korason de kada relijion i kultura se topa un kalendario santo ke es la manera de markar lo ke tiene signifikasion.
Saludes a todos.
EL TIEMPO I EL KALENDARIO DE LA ISTORIA JUDIA.
RASHI disho en el empesijo de la Tora ke la Primera Mitzva ke fue dada a los Judios era la obligasion de krear un kalendario. Un teolojisto del Siglo 20, Abraham Joshua Herschel eskrivio en su livro chiko de Shabat «El Judaismo es una relijion de tiempo i su buto es sanktifikar el tiempo.Komo konsekrar sanktuarios ke kresen del korriente magnifiko del anio.» Tanto importante es el tiempo ke la Tora dediko 4 pasagjs largos en la diskusion de los festivales importantes.Un pasaje aparese en VAYIKRA en la parte de esta semana EMOR.Al mirar parese ke ay 3 Stratas en la kreasion del kalendario komo lo konosemos oy.
El Primer Stratum se topa en el Pasaje de los Festivales de TISHREI,ke son los dias de chuflar el Shofar i de azer Tanid. Kayen aki los Festivales de la Rekolta ke son SUKOT,PESAHi SHAVUOT.
El Segundo Stratum viene de la kaida del Segundo Templo i del nasimiento del Judaismo Rabiniko.Ayi kaye PURIM i HANUKA.Los dias del Tanid son asosiados kon la destruksion de los 2 Templos en TISHA BEAV..Son dias del kalendario komo el TU B’SHVAT.Anio muevo de los arvoles.
En el Treser Stratum se ven los dias ke son asosiados kon los evenementos del Siglo 20.El OLOKOSTO i YOM ATSMAUT.
Aki vemos una konstruksion de 3 stratas distinktas kronolojikas.En realidad el kalendario representa un CONTINUUM del pensamiento Judio. Una repuesta kreativa del Puevlo Judio a las sirkonstansias ke tuvieron un impakto en muestras eksperiensias a traves la istoria Judia.
Los evenementos alrededor de la Destruksion del Templo en Jerusalem en 70CE i el rebelion de BAR KOCHBA 65 anios despues. Al no reushir,todo esto forso a los savios i santos de dar otra interpretasion para ke los festivales se basen sovre la Tora i ke kontinuen a existir por siempre entre los Judios.Mismo si no avia un Templo.Fue el jenio de los Rabinos ke trusho el SEDER DE PESAH en la manera ke existe oy.Las frutas de Shavuot se konektan kon el Resivir La Tora en el Monte de Sinaii. De ayi se va al Shofar kuando se selebra ROSH ASHANA.
Todos los festivales grandes komo se selebran oy son unas adoptasiones a traves siglos de experiensia Judia. Tomaron siempre una signifikasion mueva a fuersa del desarollio de muestra istoria.Agora mos kaie el TIKKUN de Shavuot. La idea fue introdusida por los mistikos de Tsafat en el Siglo 16/17.Las naranjas se metian en el plato en Pesah por el Seder. Esto signifika ke las mujeres no entravan en la vida publika.Esto os haze akodrarnos de traier la Agada a los oprimidos i neglijjdos komo minoridades.El Tikun Shavuot en un tiempo moderno signifika ke existen problemas ekolojikas. El serviso de Tisha BEAv absorbo unas poesias sovre Las Kruzadas i oy entra ayi el Olokosto.
Asi el klasiko es redefinido i redeskuvierto por unos usos muevos. Esto mos traie al Kommemorativo muevo de YAMIM .komo YOM HASHOAH,YOM HAZIKARON.,YOM ATSMAUT. La kestion se poza agora si en este arvole de la vida Judia se puede meter otros dias muevos i santos. O si tenemos ke inventar muevas palavras i rituales.Esto depende de la valor ke se da a los evenementos.
Ay djente ke pensa ke la Shoa i el Nasimiento de Israel son evenementos serkanos. No se puede tanto entenderlos.Se explika esto de manera tentativa.Ay Kehilot ke inkorporan el HALEL [Psalmo 113-118] en el servisio de Yom Atsmaut sin ke agan las Berahot. Esto signifika ke Israel ya existe ma no estamos muy seguro.
El kalendario kontinua a evoluar i konta la istoria Judia en tiempos diferentes de una manera ke se puede bivirla en el futuro. En pasando esto de jenerasion en jenerasion se avla de lo ke era importante a muestros ansestros i de lo ke signifika a mosotros oy.
Tradusido por Shimon Geron. Sydney
Fuente: Ladinokomunita
