eSefarad Noticias del Mundo Sefaradi
En el Sefaradi Bulletin ke la Sinagoga me envia 2 vezes al anio topi un artikulo interesante ke vo kompartir kon vozotros.
Entre los anios 1917 i 1939 los Judios en Egypto puedian ir a Palestina en obteniendo un visa en Cairo, del Poder Mandatorio Britanniko en pagando un deposito de 60 Liras. Unos no tornavan. En 1947 el viaje a Palestina se izo mas diffisil i ivan de manera illegal. Judios los ayudavan a partir kon gameyos por el dezierto ets. Empleados de las agensias de viaje los eskondian en los trenos tambien.
Otros, parvenian a ir al Libano i de ayi a Palestina. En kada vez se les dava paras debasho de las mezas…
Edmond Sanua se fue en ALIYA a Palestina en los anios 1930. Lavorava en SHELL Kada vez ke se iva eskondia 2 mansevos en sus maletas.
Dospues, dieron a komer a los patrones de los vapores ma devyeron abandonar porke los Britannikos blokaron la Kosta de Palestina. En 1943 el SOHNUT envio unos kuantos SHLIHIM para assistir al transfer.
De otra parte los Tsionistos ayudaron a los Shlihim en obteniendo papeles falsos. Los ke partian deviyan
ambezarsen a defendersen i tener un empleo ande se ivan. Esta experiensia les servio kuando atakaron
al Barrio Judio HARET-EL-YAHUD.
La Armada Britannika en guerra kontra la Alemania tenia una Brigada de Judios de Palestina. Se aharvavan en la Libya. Fueron estos soldados ke influenzaron los Judios de Egypto a partir. Estos, tenian el derecho de ir a sus kazas en Pesah. Entretiempo a munchos mansevos de Egypto ke kerian pasar la frontiera les metieron uniforma Ingleza i les enseniaron a komportarsen komo los Anglo Saxones. Se estima ke entre 2000 i 8000 fuyeron asi. Los ke los ayudaron tambien partieron de la misma manera kuando Israel i los Paises Arabos entraron en Guerra.
En 1948 la polisia en Egypto arresto una parte de la Komunidad Judia ke era Tsionista. Los metieron en kampos de detension kon otros prisonieros etranjeros. Tomaron sus bienes. Unos fueron arrestados porke se saviya ke tenian familyas en Israel. Los ke tenian pasaportes etranjeros resivian assistensia de sus embassadas. Un tiempo, a los ke no eran Egypsianos, los forzaron a partir i tenian ke sinyar papeles diziendo ke partiyan de sus voluntades. No puedian partir kon sus bienes. Al salir, todo lo ke era permetido de tomar, era 20 Liras. Deviyan partir en unos kuantos dias. Se estima ke 30.000 Judios partieron despues de la guerra. Fueron ayudados por organizasiones Judias i la Cruz Kolorada. Los vapores eran ESJPERIA, MISRI, NEFERTITI, KHEDIVIAL. Estavan yennos de emigrantes. Empesavan a kantar la HATIKVA kuando entravan en las aguas internasyonales. Empesava la libertad i la esperanza. En Egypto les dava espanto mismo de tener nombres Judios i livros en Hebreo.
La situasion en Egypto se amejoro kuando echaron afuera al REY FAROUK en 1952 i metieron al GENERAL NAGUIB. El vijito la Sinagoga de Cairo i saludo la gente ayi. La situasion se agravo kuando ABDUL NASER se izo presidente. En 1956 kon la Guerra de Suez, los Ingleses, Fransezes i Israelianos attakaron Egypto para ke el Canal de Suez no kaiga en sus manos i sea nasionalizado. Supito arrestaron a los sivdadanos Ingleses i Fransezes i empeso de muevo el exodus de los Judios, indo en vapores a Marseille, Napoles i Athenas. En 1957 de los 8.000 Judios ke bivian en Egypto, kedaron apenas 3000. Oy no ay mas de 100 i son los mas aedados.
La mayoria de los Judios en Egypto avlavan en Fransez i en el 14 de Julio se metian a kantar La Marseillaise. El Ingles vino despues de la Segunda Guerra . Teniyan una buena edukasion i konosiyan munchas linguas.
Mismo nasidos en Egypto no paresian del todo a los Egypsianos. Los ke avlavan el Arabo eran pokos. Los del pais no veian a los Judios komo unos de eyos. Mismo si eran Judios los tomavan por Europeos.
Los Judyos guadraron el gusto de la kosina del pais, komo el MOLOCHIA una supa vedre de ajo, las avas FAVA, el TAHIN, las DOLMAS, el kezo blanko i el KASHKAVAL, el MACHSI de pimiento i berenjina inchidas kon aroz o karne. Aviya una Fiesta en la Primavera SHAM EL NISSIM/Festival de la primavera. Se echava al Rio de Nile una kukla. En el pasado los pharaones echavan al rio las mujeres mansevas. Komian en el tiempo un peskado ke golia el FISIKH.
Los Judios de Egypto mismo en siendo bien adoptados ekonomikamente en Israel, la politika no los intereso. Biven en HOLON, BATYAM, BEER SHEVA , ASHDOD, JERUSALEM, HAIFA, ACCO, NATANYA i TIBERIAS.
Trezladado por Shimon Geron
Para Sefaradimuestro
Gracias Simón Geron por el magnífico artículo que ha despertado en mi muchos recuerdos.
Leo siempre con fruición todas las secciones de E.Sefarad que me ha hecho recuperar el judeo-español que hablaba mi abuela. No lo escribo, pero lo entiendo y gracias a este idioma he podido comunicarme con parientes que viven en Israel. Gracias a todos por hacer esto posible.
Si le interea el tema de los judíos egipcios, puede leer el libro que me ha publicado la editorial Hebraica y Casa Sefarad «Las Turquesas Mágicas», que relata la odisea de mi familia, oriunda de Salonica, que marchó en 1931 en Egipto. Vivieron pues bajo los regímenes de Fouad, Farouk, Naguib y Nasser. Yo nací en Alejandría y tuvimos q emigrar en 1957. Recalamos en Italia ayudados por la Agencia Judía, y estuvimos viviendo en Caracas, hasta nuestro traslado a España en 1965. Jag Pesaj Sameaj a Todos los lectores.
LA COMIDA specifica de los EGYPTIANOS ES FOUL MEDAMES KON TA’MYA ,
PARA LOS JUDOS TANBIEN.
LA NOCHE DEL SHABAT :SUFRITO.
SI CHAM EL NESSIM SALTYO EN LA SEMANA DE PESSAH ,COMIMOS MATSA AL PICNIC KON HUEVOS Y KEZO,NO COMO LOS GOYIM.
HOY VIVO EN JERUSALEM Y NO TENGO SCARINYO DEL EGYPTO.LA vida aki esta fuerte,y intense, y los ke no vienen perden muncho .
HAG SAMEAH ,MOADIM LE SIMHA ,HACHANA HA BA BIROUCHALAYYIM HABNOUYA.