eSefarad Noticias del Mundo Sefaradi
Keridos amigos i amigas, en el Jewish News de esta semana Danny Gocs presento un artikolo sovre una seria de 22 filmos i dokumentarios del Olokosto ke los van a mostrar en Melbourne i Sydney en Marso i Avril. Estas istorias interesan muncho a los produktores a traves el mundo. Aki se topan filmos viniendo de Israel, Alemania, Italia, Hungaria, Polonia, Serbia, Hollanda i Gresia.
Se ve ke son istorias de koraje, trajedia, kestion de identidad i esperansa para dar senso a una koza ke es inkomprehensible. Los filmos se van mas leshos ke el Olokosto i tratan la kestion de la Justisia Sosial, mostrando komo el pasado se ata al presente.
Saludes a todos.
ISTORIAS DEL OLOKOSTO KE INSPIRAN
La seria empesa kon un filmo Fransez «The Jewish Cardinal» i es una istoria verdadera del Arkobispo de Paris Jean Marie Lustiger, ijo de imigrantes Judios Polakos. Este ombre mantenio siempre su Identidad Kultural komo Judio mismo despues ke se konvertio al Katolisismo komo chiko i entro en el Orden de la Iglesia, suviendo de rango rapidamente,grasias a «Papa Jean Paul II. Tenia agora una platforma para selebrar su doble identidad de un Katoliko-Judio. Kuando unas monhas Karmelitas sujeraron de meter un monasterio en Auschwitz, el Kampo de Koncentrasion, Lustiger se topo en el sentro del konflikto entre los Judios i los Katolikos.
Otro filmo titulado «The Promise» onora el eroismo del Puevlo Albano en la Segunda Gerra. Aki se trata de 2 ombres viniendo de un milieu diferente kada uno. Los Musulmanos en Albania avian salvado a munchos Judios. Redjep Hodja keria kumplir una promesa ke izo su padre a una famiya Judia. Se tratava de unos livros en Ebreo ke avian deshado atras. Tenian ke ser tornados a eyos un dia. Hodja tomando el kamino de la Bulgaria se fue de ayi a Israel. En el kamino penso muncho a las relasiones ke tenia su padre kon esta famiya Judia. Esto kreo la kestion sovre su fey komo Musulmano.
Un dokumentario impresionante es «The Lady In Number 6: Music Saved My Life». Aki se trata de una sovrebiviente del Olokosto ke tiene 110 anyos i ke se yama Alice Herz Sommer. Es la mas vieja pianista en el mundo. Sus manos tan delikadas krean melodias ke tokan a la alma, biviendo en su apartamento en Londra. Esta vieja estava kon su ijo en Theresienstadt en la Segunda Gerra. Disho ke fue la muzika ke salvo su vida. Es la muzika ke salva su vida oy.
En el filmo «Prisoner Of Paradise» el aktor Kurt Gerron, un Judio Aleman se topa en Theresienstadt en tiempo de la Segunda Gerra i lo forsan a azer un filmo de la Propaganda Nazista.
En el filmo «Bureau 06: Architectos del Proseso de Adolf Eichman» el filmo egzamina la kestion del perspektivo de la Polisia Israeliana. Komo avian munchos Judios Alemanes tenian ke avlar el Aleman a la perfeksion. Ma en mismo tiempo sufrian eyos de emosiones por razon del Olokosto.
Mas i mas Katolikos en Polonia estan deskuvriendo ke son en realidad Judios i ke sus parientes avian eskondido sus identidades. Los yaman «Judios Muevos de Polonia». En el filmo «Hi Jew Positive» se introduse la Segunda i Tresera Jenerasion de los sovrebivientes del Olokosto ke deskuvren sus pasados.
En el filmo «When Day Breaks», un filmo de la Serbia, Misha Brankov Profesor de Muzika en retreta, resive una letra del Museo Judio de Belgrad para ke se presente ayi. Avian unas eskavasiones en la sivdad i venian de topar una kasha metalika konteniendo siertos dokumentos mostrando ke el profesor era el ijo de una famiya Judia en la Segunda Gerra. Sus parientes eran matados en un Kampo de Konsentrasion. El fue elevado por una famiya Kristiana de fermeros.
Al oir esto se desidio de kontinuar a eskrivir un konserto ke no era terminado desde anyos. Lo izo en onor de su padre ke era un muzisiano.
En el filmo «Cries Of The Children», 5 kriaturas Judias Gregas, salvadas por famiyas Kristianas en tiempo de guerra, kontan lo ke era engrandeser en brazos de ajenos i komo esto los afekto kuando se izieron adultos.
En el Dokumentario «October 43, The Rescue Of Danish Jews» se avla de lo ke era bivir basho la okupasion Nazista.
En el filmo Polako «In Hiding» se avla de una relasion intima entre 2 mujeres. La vida de «Janina» se troka kuando su padre da refujio a la ija de su amiga «Esther». Kuando arrestan a su padre, Janina se deside de protejir a Esther ke se sentia izolada i ke tenia espanto. Asi se desvelopo una amistad muy intima entre las 2 mujeres.
En el filmo «Lonely Planet» se ven lugares muy izolados en Rusia. «Misha» un chiko ke se fuyo a una shara en Belarus, pasa 3 anyos todo solo biviendo kon los lovos.
Tradusido por Shimon Geron, Sydney
Fuente: Jewish News / Ladinokomunita
