eSefarad Noticias del Mundo Sefaradi
Kon la muerte de Shimon Peres los sivdadanos de Israel i la Komunidad Judia Global perio una boz por la demokrasia i la paz. Shimon era un polítiko nasido en Polonia i fue uno de los presidentes de Israel i 2 vezes servio como primer ministro. Era el ultimo de la jenerasión de fondadores. En 1994 Peres kon Yitzhak Rabin fueron onorados kon el Premio de Nobel ke fue kompartido kon Yasser Arafat. Ninguno era tanto asosiado kon el Akordo de Oslo komo fue Peres. En el tiempo tenian esperanza por la reushita del akordo. Los últimos anyos darán el verdikto de un frakaso. Kada uno tiene su manera de ver las kosas. Peres fue uno ke amava a su país i a su puevlo. Dediko toda su vida a Israel.
Nasido «Syzmon Perski» en «Wiszniew/Polonia» en 1923, izo Aliya kon su famiya en 1934 después de 2 anyos ke su padre imigro. Engrandesiendo en el Movimiento del Kibutz, «David Ben Gurion’ lo vido i le ayudo para ke sea el sekreter de Mapai/Partido de Lavoro». En 1944 se metió en la kavesa de una expedisión ilegal i se fue al Negev para krear unos Establesimientos Judios. Los Inglezes lo atraparon i lo metieron en prezo. En 1947 entro en la Hagana komo ofisial en la merkansía de armas. Kuando nasió el Estado de Israel se izo Direktor Jeneral del Ministerio de Defensa. Tenia 29 anyos. Kon sus esforzos de obtener los aviones de Mirage de la Fransia, Israel se vido en una posisión favorable en la Gerra del Kanal de Suez en 1956. Fue el ke izo el plano en esta Kampanya al lado de Fransia i Ingletierra.
En 1959 fue elejido al Knesset por el Partido de Mapai i termino ser Deputado Ministro de Defensa. Mas tadre en 1974 servio en el Governo de Yitzhak Rabin. Rabin tuvo una kontroversia de devises liados a su mujer i en segida Peres se izo el Primer Ministro. Perio las eleksiones en 1977 a Likud enkavesado por «Menachem Begin». En 1980 en una rotasión extranya se vido 2 primer ministros, sirviendo kada uno por la mitad del tiempo. Peres servio komo Ministro de Asuntos Extranjeros kuando una vez de mas Yitzhak Rabin fue elejido.
En 1995 kuando Rabin fue assesinado, el Partido de Lavoro no pudo ganar las eleksiones. Esta vez Likud estava en poder kon «Binyamin Netanyahu» en la kavesa. En 2000 Peres perió la Presidensia i fue «Moshe Katzav» ke gano. Peres torno atrás en un Governo de Unidad Nasional entre el Partido de Lavoro i Likud basho «Ariel Sharon». Después de un tiempo Ariel Sharon troko de partido i kreo el Partido de Kadima. Al tener una gota, Peres esperava ser el Primer Ministro, ma este posto se fue a «Ehud Olmert».
El tiempo avía venido de jugar un otro rolo i siendo un polítiko viejo lo izieron Presidente de Israel sirviendo entre 2007 i 2014. Peres resivió onores grandes de la parte de la Reina de Ingletierra. Resivio el titulo de «Caballero de la Cruz».Los Beduines lo nomaron «Sheik».
Su vida politika empeso despues de la Gerra de 6 Dias i lo veían komo un «Hawk/Agresivo». Soportava las kolonias en tierras okupadas. Despues se izo un «Dove/Paloma» símbolo de paz. Tuvo la visión de un Israel kon el enturaje de los vizinos Arabos. La visión de paz tomo un otro torno kon la Intifada. El Medio Oriente puedia ser Una Zona de Prosperidad kon el komersio i la paz. Se vido la paz después entre Israel i el Ejipto i entre Israel i la Jordania.
En 2011 Peres perió a su mujer «Sonya» de un attako de korasón. Se avían kazado en 1945 en un kampo de mansevos. Tuvieron 3 kriaturas. «Tsivia.Yoni i Nehemia».
eres fue por dekadas un pionero, visionario i polítiko en un entorno hostil. Siendo optimisto sonyava de un Medio Oriente en paz. El disho una vez «Los optimistos i los pesimistos mueren de misma manera. Biven de manera diferente. Prefero bivir komo un optimisto».
Shimon Geron
Sydney
Para Ladinokomunita
Muy interesante
Nuestro mas sentido homenaje, a la figura de un estadista y hombre exepcional, cuya pérdida lamentamos ahora, y al cual le historia situará finalmente en el lugar de honor que le corresponde …
Descanse su álma en paz en el Ganeden junto a la de los justos …
«Amen»
Anyada buena para todos