eSefarad Noticias del Mundo Sefaradi
Keridos amigos, todos mozotros savemos ke Hanuka es una fiesta de OCHO DIAS ¿o sera mas klaro a dezir ke el esensial de la fiesta es en las TADRADAS?
Al pareser, ke el primer manadero ke mos konta sovre esta fiesta fue un tal Hanania ijo de Hizkiya ke eskrivyo en el primer siglo un livriko yamado «Megilat Taanit», i ayi mos dize:
«En el 25 de Kislev empesa dia de Hanuka ke es fiesta de ocho dias en los kual es defendido de azer Taanit o dizir lamentasiones».
En la Gemara mos kontan sovre Hanuka, ke kuando los Hashmonaim/Makabeos ganaron la gerra kontra los Gregos, entraron al Bet-aMikdash i ayi toparon un solo kantariko de azeite de oliva pura i limpya, siyada por el Kohen Gadol (el gran saserdote). Se les izo un nes, un milagro, i la azeite del kantariko turó, i afilu sovró, para ocho dias.
Entonses, desidaron ke kada anyo i anyo mijorado, se van a fyestar estos dias kon loores i agradesimiento.
Es kuryozo ke en el Livro de los Makabeos, no se nombra este milagro del todo. Ayi eksplikan la alegria de ocho dias por ke fue verso los ocho dias de Sukot (djuntos kon la fiesta de Shemini Atseret) ke no avia posibilidad de fiestarlos a su tiempo syendo ke muchos del puevlo de Yisrael, (mujeres, viejos i ninyos), estuvyeron en akeyos dias eskondidos en las kavernas i en las montanyas, mientres los mansevos del puevlo, los Makabeos, gerreavan kontra el enemigo, la armada Grega-Seleuka de Antiyohus Epiphanes.
En uno de los komentarios sovre la perasha de la semana, el RAMBAN (Rabenu Moshe ben Nahman, konosido en el mundo komo Nahmanides), aze distinsion entre «milagro okulto i eskondido» i «milagro klaro i evidente».
Sovre el milagro «eskondido», tal vez lo avlaremos mas en los dias de Purim. En meldando la Megila de Ester no vemos ke okuryo a los Judyos algun milagro «afuera i mas arriva de la natura». No se les kortó la mar, ni sopló alguna tempesta para bolar i despareser el palasio de Aman el malo. La salvasion mos vino aparentemente, (al menos a prima vista), mezo diplomasia de Mordehay i el «tener hen» de Ester.
En Hanuka, segun muestros hahamim, el milagro fue un nes evidente: el kantariko de azeite para ensender la Menora del Templo (ke apenas era sufisiente por un solo dia), turó ocho dias enteros i dyo luz i alegria.
Lo ke vemos, de toda manera, es ke muestros hahamim mos enkomendaron de dizir mizma orasion, «Sovre los milagros», en Purim igual komo en Hanuka.
Ma, no mos olvidemos tambien ke en Hanuka okurio otro un milagro: los pokos (los Judios) venseron a los numerozos enemigos (Gregos-seleukos). Si fue este algun nes okulto o un nes evidente, no lo se, i no importa.
Tenemos de agradeser siempre al Dio komo la dicha de muestros padres sefaradim: «Por lo ke estamos – bendigamos».
Ansi tambien dizimos en la orasion de «Modim» de kada dia:
«Atorgantes nos……sovre tus milagros ke en kada dia kon nos, i sovre tus maravias i tus bienes en kada ora».
Hanuka alegre a todo Yisrael !
Yehuda Hatsvi
Erets Yisrael
