eSefarad Noticias del Mundo Sefaradi
Gabrielle, disenyadora de la moda franseza i fondadera de la marka CHANEL. Nasida en el anyo 1883 en Fransya Saumur.
Si avia mas mujeres komo eya, el mundo, seriya muy diferente. I puedeser ke las mujeres ivan a ganar un poko mas de respekto.
Agora meldaremos su vida de su boka mezmo.
“Kreyevos ke dingunos no me ambezaron a kuzir. Me ambezi por ke fui ovligada. Primeros tyempos lo ke kuziya no era un arte, era para kedar en vida.
Yo vine al mundo en una famiya muy muy prove. Mi mama muryo kuando teniya apenas dodje anyos. Mi papa, el titro papa no le meresyo, el me abandono komo ke no era su ija. Supito me topi en un orfelinato sola, abandonada, las noches me durmiya kon friyo, arogava al dyo, un poko ke me se kayenten los pyezes i las manos. Las ke se okupavan del orfelinato me ambezaron a kuzir. Kortar i kuzir las ropas no era lo ke keriya ma syempre me diziyan;
“Gabrielle ambezate a kuzir, un diya vas a salir de aki ambezate para ke tengas una vida mas mijor”.
Ama yo no keriya esta vida, kuziya en silensyo ama kada ves ke apuntava la alguja a la ropa mi korason echava gritos.
Yo syempre teniya otras ideas aryento la kavesa. El tamperamento miyo era no tomar orden de dingunos i dingunos no pueden dar karar por mi vida. Kuando va salir de aki, yo no kero kuzir para kedar en vida, si la ekspresyon es djusta yo kero bolar. Kuando en kuzyendo, kuando en pensando ansi paso los anyos. Sali del orfelinato.
Anyos dospues empesi a vender mis chapeos echos por mi mano.
La djente se burlavan de mi. Komo una mujer salida del orfelinato puede avrir botika, eya kualo save, kualo va parvinir. Ma todas las ke estavan avlando no me konosiyan i no saviyan ke estas palavras me davan mas muncha fuersa.
Un dia una mushteriya, me arebasho i me disho:
-Este chapeo tu lo izites?
– Si yo lo ize
– Esta muy elegante me paresyo ke vino de Paris
Kon una sonriza le respondi
-Madam! yo so Paris ma tu no te entyendes de nada.
Kon kada chapeo ke vendiya, kon todos los fostanes ke me kuziya, sin ke me den orden dingunos, libre, sin reglas i sin espanto, esto era la persona ke keriya ser.
En un dor ke todas las mujeres teniyan kaveos largos yo me fui al kuaför i me korti los kaveyos komo un ombre.
Todos me disheron te izites komo un ombre. No les respondi, agora me ize yo, a mi me plazyo esta fason de kaveos, el resto no me emporta.
Munchas amigas me ensultaron, me yamaron loka, me toparon vulger, nunka una no me disho bravo Gabrielle.
Vide gerras, vide destruisyon, muertos, las botikas me se serraron el tyempo la okupasyon de los Nazis, oyi dizir ke Chanel ya eskapo, su tyempo ya paso ma yo nunka pedri la esperansa, torni a Paris, kontinui a lavorar i amostri a todos mi koraje.
Yo no era solo una marka, yo era una idea i una gerreadora umana.
Chanel no.5 dizen ke es el mas famoso parfüm del mundo. Chanel para mi es koraje, es, no arepintir, Chanel no.5 es la golor de una ija abandonada ke se engrandesyo en el orfelinato, es la golor de una ija ke se entezava en su kama i yorava fin demanyana.
Gabrielle termina sus rekuerdos kon estas palavras:
Mezmo si nasites en el lodo puedes avrir flores. Porke las flores mas ermozas kresen en las ruinas.
Gabrielle muryo el 10 Enero en el anyo 1971 en Paris.
Keridos ermanos mazaltov syempre estesh kon koraje
Forti BAROKAS
Fuente: turkisrael.org.il
