Estamos Whatsapeando kon Albert Israel: «Akel tyempo…» 3 (kon boz)

Meldar todos los artikolos de esta seksion >>

Puliya

 

 

 

 

 

 

Fraza del dia: No te agas puliya!!!

———————————-

Librik

El kave se koziya en librik chiko ke abastava para una o dos personas i en lumbre basha para ke tome la savor.

Fraza del dia: Esto es kave savrozo i no pishada de bivdas!

WSP 21.04.2021

———————————-

Kave

El kave se beviya en findjanikos chikos i no komo oy en «chukales». Lo maz importante era la tela, «el kaymak».

Fraza del dia: A la novya i la tela no las mires kon kandela.

WSP 22.07.2021

———————————-

Untar

 

Una de las «hazinuras» muestras, los sefaradis, es el untar. Sin untar no puedemoz. Ma no se puede untar en el kave preto. Se le va la tela i se bozdea el fal…

Fraza del dia: El prove i el hazino, no tyenen amigo.

WSP 25.07.2021

———————————-

Fal

 

 

Dospues ke se beve el kave, se abolta el findjan rapidamente al chiniko i el kave se mete a «sekar» para mirar el fal…

Fraza del dia: La roza se seka, la verdad keda.

WSP 26.07.2021

———————————-

Mirar el fal

Agora vino la sira (torno) de mirar el fal:
«Aki ay un kamino ferah (espasyozo), vas a tener un viyaje de achilear (avrir) el korason… Na mira a este pashero, es ke te va vinir un mazaliko komo dezeya tu alma. En supito lo vas a topar al lado… Abasho esto vyendo ke tyenes un bulto de korason, te esta apretando un poko, ma no te estrecheyes, todo se va espajar en serka… I este pishkado de aki… Es ke vas a aresivir munchas paras…»

Fraza del dia: Al ken beve vino, el diavlo lo yeva por otro kamino.

WSP 27.07.2021

———————————-

Mirar el fal 2

Dospues ke se mirava el fal de lo ke aviya en el findjan, se mirava el fal de lo ke sovrava en el chiniko. Ande mozotros, los sefaradim, no se piedre nada…

Fraza del dia: Ken kere lo muncho piedre i lo poko

WSP 28.07.2021

———————————-

La hohma de muestras madres

La hohma de muestras madres:
Mi madre mirava el fal en kave, debaldes. La kaza era syempre yena. No solo vizinas i amigas. Mansevas ke viniyan de leshos. Mizmo kuando mi madre era ayedada.
La ermana de la sovrina de la vizina…
La amiga de la inyeta de tant Neli…
Kuando me engrandesi i vide munchos aedados asolados, entendi ke muestras madres saviyan la valor de ser en kompaniya, muncho mas antes ke Sigmund Freud envento la «psikolojiya sosyal»…

Fraza del dia: Savidura sin eksperiensya, komo una kasha vazia.

WSP 29.07.2021

———————————-

Dospues del kave

Dospues del kave se sirviya dulse de kaza kon agua para ke se vayga la amargura.

Fraza del dia: El ke englute amargo no eskupe dulse.

WSP 02.08.2021

———————————-

Albert Israel, Yerushalayim
Shefe del sirkolo de konservar i promover la kultura sefaradi