En vista de Rachel: Yehuda Halevi, Berta Aguado, i Yom Yerushalayim por Rachel Amado-Bortnick

Ver todos los artículos de esta sección >>

Oy es el 28 de Iyar en el kalendaryo djudio, un dia ke en el anyo de 1967 korespondyo al 7 de djunio.  El 12 mayo de 1968 el governo israeli proklamo el Yom Yerushalayim komo una fiesta mueva a selebrarse kada anyo el 28 de Iyar.

Ya vos vash akodrar de la «gerra de sesh dias” ke rezulto en la viktoria Israeli i la reunifikasion de Yerushalayim, ke es la dominasion djudia de la sivdad entera despues de 1897 anyos (del anyo 70 – la destruksion del reynado de Judea – asta 1967.)

A esta okazion vos kije eskrivir un poko de la ermoza kantika sefaradi “Ir me kero madre a Yerushalayim”, ke ekspresa el eskarinyo de muestro puevlo durante estos 1897 anyos.

Si bushkash “ir me kero madre” en Youtube, vash a topar munchos kantantes de esta kantika, ma la ke me a mi me agrada mas de todas es la de Berta Aguado, dbm, ke la kanto “impromptu” durante un pranso.

Dizin ke los biervos son inspirados del poema de Yehuda Halevi.

Aki vos do los biervos de los dos para ke agash la komparasion.  Lo ke es siguro es ke komo Yehuda Halevi (nasido  ±1080 en Toledo o Tudela, Espanya) desho su pais natal i viajo a la Tierra de Israel (ande murio en 1141), ansi tambien Berta Aguado (nasida en Canakkale, Turkiya en )1929) desho su sivdad natal i izo aliya a Israel en 1979, ande murio en 2016.)

Kon la esperansa i la orasion de Paz a Yerushalayim i a todo el mundo, vos prezento los biervos de estos mensionados:

Los biervos de Yehuda Halevi (mi traduksion de la traduksion en inglez.)

My korason esta en el Este,
Ma el resto de mi esta en el Oeste ekstremo. ──
Komo puedo tomar savor de esta vida, o mezmo de lo ke komo?
Komo puedo yo, en las kadenas del Moro,in the chains of the Moor,
Sion en las kuedras de la Kruz,
Azer lo ke prometi i lo ke devo?
Kon plazer desharia
Todo lo bueno de la grande Espanya
Para yegar a ver el polvo de Yerushalayim.

I aki los biervos de la kantika  “Ir me kero madre” Ke kanta  Berta en el video. (Otros kantantes tienen algunos biervos diferentes.)

Ir me kero madre a Yerushalayim
A pizar las yervas
I artarme d’eyas

En el Kotel a- Maaravi
Ay una ziara
Todas mis demandas
Ayi me se afirmavan

En El me arimo yo
En El me figuro yo
En el Patron del mundo.
En el Sinyor del mundo

—————-

Rachel Amado Bortnick – Dallas