eSefarad Noticias del Mundo Sefaradi
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
VIDA I SALUD I TODO BUENO
Ke este en ganeden mi mama, kada ves ke le empesava a kontar lo ke me sonyi entre la noche, me dizia “vida i salud i todo bueno”.
Esto me vino al tino kuando pensi por los dias eskuros ke pasimos despues del insidente de la “flotilla” I el vapor (barko) Mavi Marmara en Gaza, el 31 Mayo, 2010. Dezearia ke esto fuera nada mas ke un esfuenyo negro, i ke en despertandome iva topar ke no paso nada de mal entre Turkia i Israel, los dos paises ke yo amo!
Kreygo ke dingunos no pueden sentir la dolor del rompimiento de buenas relasiones entre estos dos paises mas ke los djudios de Turkia, i los turkanos en Israel o en kualker pais en el mundo. Vimos la ekspresion de esta pena en el Shalom, semanal djudio de Estambol, el Bulten de Itahdut Yotsei Turkia (Sosietad de Emigrantes Turkos en Israel), ansi ke en reportajes kon turkanos publikados en varios otros jurnales en inglez, en ebreo, i en turko. En un reportaje en el jurnal “odatv” en turko, Rafael Sadi de Israel (ke era amigo de eskola del Primo Ministro Erdogan en Turkia) disho ke los turkanos-israelis se sienten komo la kriatura ke ve ke su padre i madre se estan peleyando i se van a divorsar!
Grasias al Dio, en Turkia no uvo (ni ayga) dingun danyo a los sivdadinos djudios, grasias a las prekosiones tomadas por las otoridades, i las deklarasiones del governo i munchos eskritores ke los djudios del pais son igual a todos los turkos i no tienen nada ke ver kon la politika de Israel.
Esto lo aklaro tambien ultimamente Yakup Barokas en su eskrito en Shalom (edision del 15 djunio) entitulado “Nada no va ser lo mismo mas?”
Este titolo es la forma en kestion de la deklarasion en el 2 djunio del Primo Ministro Erdogan ke en las relasiones kon Israel “mas nada no sera lo mizmo.” Aki el Sr. Barokas mos da mas enformasiones i pensamientos, siertos de los kualos vo los transmeto, kon mi traduksion i adaptasion del turko, kon unas eksplikasiones en parantesis.
“Komo trokaron las kozas en diez anyos! En 1999, despues del rash (terretemblo) [en Turkia] de Israel yego un barko de la kompania Kavlan, yeno de kashas de alimentasion, melizinas, i vestimientas (serka100 tonos) arekojido por las organizasiones sivil israelianas komo la Union de Turkanos, la Union de Kibutsim, i Latet , i dado en mano del Kizilay (Luna Kolorada, organizasion turka ekivalente al Red Cross, o Cruz Roja. ) Unos kuantos de mozotros fuimos a Adapazari (sivdad serka el sentro del terretemblo) ayudar a la distribution de esto. Poko despues, Ehud Barak, el Primo Ministro israeliano fue resivido por el Prezidente (turko) Suleyman Demirel i el Primo Ministro (truko) Bulent Ecevit, a la okazion de la inogurasion del “kazal Turko-Israel” konstruido para los viktimas. (El ayudo ke se mando kon el Mavi Marmara era 25 tonos, i a Gaza entra kada dia 100 tonos de material.)
No fue una mano majika ke mos toko i izo todo dariva abasho; es klaro ke los ultimos evenimientos trusheron al mas basho nivel las relasiones amistozas, al grado de romperlas. Puede ser aki ay un efekto de la dura pozision del governo israeliano por azer paz kon Palestina.
Ma mos akodraremos ke en muestra edision del 28 Avril, el koluumnista Denis Ojalvo avia eskrito:
“…no kreygo ke es posible ke el governo de la Republika Turka no tiene haber (no save) de la aktividad de los barkos ke se aprontan a salir a kamino kon el slogan de “Destinasion Palestina, Kargo Libertad” i el buto de romper el blokeo delantre del porto de Gaza.”
“Si uno de muestros eskritores pudo ver un mez antes los sinyos de una kriza venidera, deke no lo vido el governo Turko? O es ke no esperava ke el governo Israeliano iva defender a los barkos de romper el blokeo?
“En 2009, el volum de komerso entre los dos paises avia yegado a 2,5 milyardas de dolares. Dainda ay mas de mil firmas israelianas en relasiones seriozas kon Turkia. Siendo ansina la vanda ekonomika, kreygo ke no es realistiko avlar de “boykot” de parte a parte, i ke, en la vanda politika tambien, presto o tadre, kada piedra se va aresentar a su proprio lugar. ”
En verdad! Ke kontentes ke estavamos unos dies anyos antes, kuando viamos aktos de amistad entre los puevlos i los estados turkos i israelianos! Ishalla ke, komo mos dize Yakup Barokas, kon tiempo “kada piedra va venir a su lugar”, i las amistades rotas se van a reparar. Entonses vamos a pensar en estos dias komo un esfuenyo negro del kual ya mos despertimos, i todo mos se va azer “vida i salud i todo bueno.”
[print_link]
Esto de akodro kon ti, Rachelika en lo ke dishes. I mi mama dishia vida, salud i todo. El d-o kera ke todo se vuelva a la convivensia de antes.
Un otra kosa ke dishia mi mama kuando le kontabamos algo ke mos paso: «las oras buenas!!!!!!!»
Esfuenyo de rashel..
Siyenpre me akodro de mi abuela,mi madre ,miz tiyaz,i mujeres SEFARADIs de suz dulsez palavras yenoz de bendisyones i selestiyal sentimiyentoz…..agh mujeres SEFARADI siyenpre fuitej iNOLVIDAVLEZ.
Palavraz ke uzava mi madre>>>; KAMINOZ DE LECHE I MIYEL KE TENGAZ…YO KEME VAYA KURBAN POR TI…EN LA OSKURIDAD LAZ ESREYAS KE ALELUMBRE TU KAMINO…..ETS.
ANTEZ KE LA FLOTILA teorista mundiyal salyo
a rumbo para las aguas de muestra kaza ISRAEL DE ande tambiyen yamo mi kaza Turkiya….
Ya saviyamoz ke el primer ministro Turko ERDOGAN estava enbulukrado para ensenyar ke ez el Champiyon de los teroristas Hamas ……Yo en mi pensanmiyento topo el kulpavle de loz 9 muertoz en el insidente marital al primer ministro de Turkiya ERDOGAN.
Tambiyen esto seguro ke la amista entre ISRAEL i TURKIYA
va enfloreser otra vez …Tiyenpo pasado aze olvidar maloz
entyendimiyentoz
A todos ke leyeron mi eskrito>>>NO DSHES KE DINGUNO VOZ ROVE VUESTRA FELISIDAD…..SAL AMIRA EN MIAMI.
Segun se ven las kozas oy, las relasiones entre Israel i la Turkiya no paresen ke en poko tiempo se van a boltar en idilia i amor!.
La razon es una i simple: La Turkiya eskojo a un primer ministro ke tiene su agenda ke el la ekzekute disde 2002, el dia ke vino al poder kon grande mayoria. Esta agenda tiene por buto de alesharse de las valores adoptadas por el fundador de la republika Turka en 1923, Ataturk. Estas valores eran las del mundo oksidental, el laisizmo, la vestimienta de mujeres i ombres, al alfabet latino, etc. Lo ke reprezenta el partido del primer ministro Erdogan, es tanbien un deskarinio ala pozisyon sentrala de la Turkiya en el mundo Islamiko, segun era el imperio Ottomano. El tambien no esta kontente de la pozisyon sentrala de la armada Turka, ke segun la konstitusyon es guardadora del laisizmo.
I para esto, deskorsos inflamantes kontra lo ke aze Israel para su defensia son el instrumento el mas efikas para mostrarse Musulmano ke proteja a los «desmazalados» Palestinianos, ke «sufren de la tirania de Israel ke los desha ambiertos en Gaza, i ke save matar a inosentes!». Mesmo la flotilla salyo a kamino kon su aprobamiento.
Sr. Erdogan es bastante intelijente para no sakrifikar a la chika komunidad Judia de Turkiya, porke su teza es el anti-Israelizmo i no el antisemitizmo. Ma las manifestasiones de los relijiozos mostran una enimistad no solo a Israel, ma al Djudio tambien. I por esto eyos tienen la proteksion de la polisia en las sinagogas i eskolas.
Todo puede amejorar -no si Israel demanda ekskuzas, komo lo dizen los Turkos- ma kuando las proksimas eleksiones en Turkiya en 2011 lo van a abashar del poder al partido de Erdogan. Esto sera bueno para la Turkiya moderna, i tambien para las relasiones politikas, militares, komersialas i turistikas entre Israel i la Turkiya.
Selim Amado
Grasias a todos los ke komentaron por mi eskrito. Saludos a todos.
Rachel