En vista de Rachel: Sovre dos aniversaryos emportantes de 2010

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.  
 
 

Sovre dos aniversaryos emportantes de 2010 

Antes de azer los adios al anyo 2010, kije akodrarme de los dos aniversaryos emportantes ke tuvimos oganyo: el de 500 anyos del nasimiento de Doña Gracia Nasi, i el de 150 anyos de la kreasion de la Alliance Israelite Universelle. Es muestro dover komo Sefaradim de konoser I apresyar estas dos grandes influensas en la estorya de muestro puevlo.

Donya Grasia Nasi (Beatrice de Luna, kuando se pasava por kristiana) es una eroina de la istoria sefaradi, konosida por los djudios del Imperio Otomano komo “La Sinyora” kon muncho karinyo I respekto, famoza  por su filantropizmo por el bienestar de djudios i djudaismo, ansi ke su kapachidad en negosio, su koraje kontra la maldicha Inkizision, I su poder kon reyes I governadores, I mezmo el sultan otomano. Kuando la Tierra Santa vino debasho del domino otomano, tuvo la idea de re-krear en Tiberia una komunidad djudia otonoma, para una futura “kaza nasionala” para el puevlo djudio.  Esto, mas de 300 anyos antes de Theodor Herzl!

 En Israel oganyo, el 24 Oktubre, uvo una seremonia de komemorasion de Grasia Nasi en la rezidensia prezidensial (Beit Hanassi) en Yerushalayim, ande partisiparon el Presidente Shimon Peres, sinyor Yitzhak Navon (el sinken prezidente del Estado de Israel i agora presidente de La Autoridad de Ladino), el Ministro de Edukasion Gideon  Sa’ar, I munchos otros dinyitarios.  El sinyor Sa’ar disho ke Donya Grasia era Sionista antes ke el biervo egzistiera.  Una kurta reprezentasion teatral mostro una topadura imajinaria entre Donya Grasia i Herzl, ande Herzl atribuo la kreasion del sionizmo a Donya Grasia.  Su vida se va ensenyar de agora endelantre en los liseos I en la armada de Israel.

En los Estados Unidos, oganyo se fondo el “Doña Gracia Project” (DGP), kon el buto de promover la konosensia de Donya Grasia, I de kriar un fondo de bekas para ijas ke estudian finansia I komerso.   Entre las fondadoras esta Andree Aelion Brooks, autora del livro “The Woman who Defied Kings: The life and times of Doña Gracia Nasi, A Jewish Leader during the Renaissance”  (“La mujer ke konfronto reyes… una lider djudia durante la Renasensia”) publikado en 2004.  El primer programa del DGP se izo en New York el 8 Junio, 2010.

Para saver mas sovre esta sovresaliente mujer, vos ago akodrar ke aki en eSefarad se publikaron unos kuantos artikolos, ke se pueden topar en metiendo “Dona Gracia” en “buscar.”  I komo mos aviza Gad Nasi en su artikolo, podesh abashar del Internet su livriko biografiko en inglez.   En kualker lingua ke preferash meldar, no mankan artikolos I livros sovre eya. 

El nombre de Donya Grasia se topa oy en dia en una kaye, un muzeo, i un otel en Tiberia. Otro lugar ande bive su memoria es Izmir, Turkia, ande ay un kal antiguo “La Sinyora” o Giveret en ebreo, otentikamente renovado, I mantenido en buen estado  (En Estambol tambien se topava un kal I una yeshiva kon el mizmo nombre, ma este ya no egziste.)

Ma mas muncho de todo, el nombre de Grasia Nasi sera siempre gravado en su lugar de onor en muestra memorya djudia i sefaradi.

—–

La Alliance Israelite Universelle se fondo en Paris en 1860 para la edukasion de kriaturas djudias en el mundo, I establesio munchas eskolas en el Imperio Otomano. Munchos de muestros padres I madres (o nonos I nonas) estudiaron en estas eskolas yamadas en muestra lingua “La Aliansa.”.  Aunke lo mas de los elevos eran djudios, aviya tambien muslumanos I kristianos porke las eskolas de la Alliance se konsian por sus alta kualidad de edukasion evropea, la lengua I kultura franseza, I disiplina kon respekto, I toleransa mutual. 

Rene Cassin, ke fue el prezidente de la AIU de 1943 asta 1976,  era el autor prinsipal de la Deklarasion Universal de Derechos Umanos de 1948. (El era miembro del governo de Fransia Libera de Charles de Gaulle en Londra durante la Sigunda Gerra Mondial.)

En Fransia se selebro los 150 anyos de la AIU kon varias aktividades.  En verano, kanal 2 de TV France mostro dos programas de 30 minutos sovre la Alliance, el sigundo siendo sovre la libreria djudaika de la Alliance, ke es la mas grande de Evropa.  Tambien se organizo una ekspozision en la Munisipalidad de Paris del 4 Septembre al 16 Oktobre, ande se mostro fotos, videos I objetos de la prezensia de las eskolas de Alliance en los paises mediterraneos, asta ke estas fueron serradas despues del establesimiento del Estado de Israel.  Ma la AIU nunka kedo de ser aktiva, I agora esta vriendo eskolas en Evropa I Amerika. 

Tambien se publikaron timbros postales a esta okazion, uno en Israel en enero, I otro en Fransia en septembre.  El timbro Israeli tiene foto de una eskola de la Alliance en Teheran en 1936, I el fransez amostra dos estudiantes, un ijiko I una ijika, eskriviendo en un tablo de klasa el biervo “ambezar” en fransez, arabo. I ebreo. 

Estas enformasiones las tomi de un artikolo en el periodiko “the Israeli Philatelist” eskrito por Jean-Paul Danon, ke su padre, Abraham Danon, fue direktor de la eskola de la Aliansa en Estambol en presipio del siglo vente.

Kon todo lo bueno de edukasion moderna ke trusho la AIU a la jenerasion de muestros padres I avuelos, no podemos enyegar ke esta edukasion inyoro, I menospresio, muestra lingua djudeoespanyola.  Ma en okazion del aniversaryo, no es djusto kritikar al ke esta fiestando, I por esto no diremos mas nada agora, otro de felisitar a la Alliance Israelite Universelle, I ogurarle munchos anyos I siglos mas de aktividad en favor de muestro puevlo I la umanidad.

Rachel Amado Bortnick
Dallas – USA