En vista de Rachel: Seremonia en el kal de Aleksandria, Ejipto por Rachel Amado-Bortnick

Asegun el artikolo de Times of Israel (https://www.timesofisrael.com/over-180-jews-gather-in-alexandria-to-celebrate-shabbat-in-refurbished-synagogue/)  este Shabat pasado tuvo lugar la seremonia de aviertura de esta kehila, ande assistieron 180 personas, munchos de eyos djudios orijinarios de Ejipto ke vinieron de varios paises, ansi ke el embasador amerikano en Ejipto (Jonathan Cohen) i el anterior embasador de Israel (David Govrin) i munchos “atachés” kulturales.

Dos hahames/rabinos dirijeron las orasiones de Shabat, el uno siendo Yosef Nefussi, el ijo del ultimo rabino de Alexandria, i el otro Andrew Baker  (ashkenazi)  direktor de sujetos djudios del American Jewish Committee.  Para las akafot kitaron 12 sefertoras del ehal, de entre las 60 ke poseda esta kehila. Del raporto en el artikolo i de las fotos ke vemos en el enlase ke vos do ariva, fue una seremonia muy emosionante.

Esta sinagoga en su forma aktuala se fraguo en el siglo 19 ensima de una antigua del anyo 1354.  Akomoda 700 personas i es una de las mas grades sinagogas del Medio Oriente. La kava renovasion  kosto miliones de dolares, turo tres anyos i fue kompletado el mez pasado.