eSefarad Noticias del Mundo Sefaradi
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
Ver todos los artículos de esta sección >>
Salvar las sinagogas de Izmir
La komunidad djudia de Izmir oy es chika (poko mas de mil personas), i no reflekta su rika i larga istorya, desde ke yegaron a la sivdad miles de sefaradis en el siklo 17, i avia kresido asta tener 30 mil personas en el siglo 19. La kavza prinsipal del amenguamiento fue una seria de emigrasiones, en primero a las Amerikas (sovre todo a Argentina i Uruguay) i Evropa en los primos anyos del siglo 20, al muevo estado de Israel en 1948-52, i desde entonses gradualmente a otros paises o a Estambol.
A los presipios del siglo 20 en Izmir avia 34 sinagogas – o “kiylas”, en el dialekto Izmirli (del ebreo kehila, komunidad.) Oy kedaron 13 de eyas, algunas de las mas antiguas en negro estado, vazias i kuaje derrokadas. Estas se topan en la seksion del bazar sentral de Izmir, konosido komo Kemeralti, la zona mas antigua, instalada en tiempo Romano. Aki era la vieja “djudriya”/ juderia, I kontiene la mas grande konsentrasion de monumentos djudios en la Turkia entera. Las kiylas estan eskondidas detras de paredes, guertas, o magazenes, en kalejikas i kalejones. En la mizma zona ay sesh meskitas (mosques), lo ke reflekta la larga istoria de vida djudia en paz i trankilidad kon muslumanos.
Para salvar estas antiguas sinagogas en 2010 se formo en Izmir una organizasion yamada Asosiasion por la Erensia de Kultura Sefaradi de Izmir (en turko: Izmir Sefarad Kültür Mirasi Dernegi – ISKMD) kon la kolaborasion de la komunidad djudia de Izmir, la fondasion Kiryati de Israel, i el apoyo del governo turko i la munisipalidad de Izmir.
El projekto prinsipal de la ISKMD es restorar las sinagogas de Kemeralti ke estan kuaje una al lado de la otra, i formar de eyas un sentro de estudios de la istoria djudia de Izmir, kon muzeo i biblioteka, avierto a vijitadores, estudiantes i akademikos del mundo entero.
Dar a konoser el Projekto Izmir
Para realizar este gran projekto, la ISKMD va tener menester de donasiones finansial de todas partes del mundo. I para esto, sus miembros estan lavorando I dando a konoser sus planos a reprezentantes de organizasiones internasionales, muzeos, i mas.
El anyo pasado Klaus Netter, reprezentante de B’nai Brith International en las Nasiones Unidas, estuvo en Izmir, vijito las sinagogas, tomo enformasiones sovre el projekto, i prometio su ayudo.
La ISKMD se izo miembra de la Asosiasion Evropea de Museos Judios (AEJM), i asistio en sus seminares para tomar enformasiones sovre la administrasion de muzeos, sovre objetos de judaika, i mas.
Oganyo, el kongreso internasional de Centro Sefarad va tener lugar en en Estambol (3-5 junio) i Izmir (5-7 junio.) Centro Sefarad es una organizasion atada al ministerio de kultura en Espanya. Miembros de la ISKMD asistieron en el primer kongreso ke tuvo lugar en Sofia, Bulgaria, antes dos anyos. Los personajes espanyoles ke van a asistir al de Turkia, van a tener la okazyon de konoser el gran projekto de restorasion de las sinagogas i objetos de los sefaradis de Izmir. I eyos ayudaran, sin duda, a promoverlo i apoyarlo en Espanya i otros paises.
Emportansia del Projekto
La restorasion de las sinagogas, I la kreasion del muzeo I sentro de estudio de la kultura djudia de Izmir, aze parte, I es el mas emportante komponente, de la restorasion de la zona antigua de Kemeralti en Izmir. Kuando sera kompletado, va ser una enteresante atraksion turistika para la sivdad.
Ma, mas de todo, va ser una maravioza manera de onorar i prezervar por siempre la larga istoria, rika kultura, i unika erensia de los djudios Izmirlis en la memoria del mundo.
Es un projekto ke merese ser apoyado de Izmirlis i desedientes de Izmirlis en el mundo entero, ansi ke de todo djudio I non-djudio ke apresya una de las mas ekstraordinarias istorias umanas.
Un video, plano, I mas enformasion (en inglez) sovre el projekto de Izmir http://www.ltbdesign.com/clientfiles/izmir/newsletter1.html:
Rachel Amado-Bortnick
Dallas – Texas
Fondadora de Ladinokomunita
Notas a los lektores de este artikolo:
1. Malorozamente la R de Izmir le manka en el titolo.
2. En el nombre en turko de la Asosiasion algunas letras salyeron komo «?»s. Se puede eskrivir tambien ansina: Izmir Sefarad Kültür Mirasi Dernegi
3. El enlase ke kije darvos a la fin, ke kontiene mas informasion, djuntos kon el video, es:
http://www.ltbdesign.com/clientfiles/izmir/newsletter1.html
Rachel Amado Bortnick
NdR: Se ha corregido la omisión de la «R» y se han eliminado las letras turcas de forma de eliminar los ‘?’ que aparecían en el nombre de la Asociación dejando la nueva versión propuesta por la autora.