eSefarad Noticias del Mundo Sefaradi
Ver todos los artículos de esta sección >>
_________________________________________________________
Re-djudaizar a «Santa Maria La Blanca» de Toledo?
Komo ya savemos, la vieja sinagoga Ibn Shushan de Toledo, agora konosida komo «Santa Maria la Blanca», fue fraguada en 1180, ma despues de las matansinas de 1391) fue expropiada i en 1411 fue transformada en iglesia/kilisya katolika. Aunke agora fonksiona komo muzeo, dainda apartiene a la institusion katolika.
Esta semana el jurnal elektroniko espanyol, abc.es, mos aviza ke Isaac Querub, el presidente de la Federasion de Komunidades Judias de Espanya» (FCJE) avlo a la adjensia Europa Press sovre la petision ke avia mandado su komunidad demandando la restitusion de la «Sinagoga Mayor de Toledo, konosida komo Santa María la Blanca.» Disho el: «estamos en un proseso de dialogo kon el Arzobispado de Toledo… la relasion es buena, kordial, i de entendimiento.»
Aki el artikolo: Los judíos de España piden restituir Santa María la Blanca como Sinagoga Mayor de Toledo
Ay esperansa ke los katolikos la van a dar atras?
Mos akodraremos de un otro artikolo, este datado del 23/2/2017, tambien en abc.es: El Arzobispado defiende la propiedad de Santa María la Blanca que reclama la comunidad judía
En este meldimos ke el Arzobispo (Kapopiskopos/Archbishop) de Toledo, en repuesta a la petision de la FCJE, defendio la propriedad eklesiastika de la sinagoga, dizendo ke no ay dinguna duda ke es ansi! TAmbien el artikolo mostro ke uvo dos otras okaziones (en 1992 i en 2000 ) ande se diskutio pasar la propriedad en otras manos (aunke no direktamente a manos djudias) sin dingun rezultado. Eksplika tambien ke la petision no demanda a la iglesia de dar la propriedad atras a los djudios, si no ke, i darla al estado espanyol i deklararla komo sinagoga, komo un «retorno simboliko.» Ma asta agora sin dingun rezultado.
Desha veremos ke va pasar agora. «Kaminando i avlando,» komo dizimos.
Rachel Amado Bortnick
Dallas, Texas
Ladinokomunita
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
