eSefarad Noticias del Mundo Sefaradi
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
No desharemos inyorar la istoria Sefaradi
Aki en la Amerika (Estados Unidos) los programas de notisias de television dan muncho lugar a alguna okurensa emosionante lokal, prefereblemente relasionado kon una kriyatura. Ansina fue en pasadas kuando una kanal de CBS en Florida mostro un ijiko de diez anyos (Harris Ness) ke vendia limonada para donar la metad de su revenido al muzeo del Olokausto en memoria de su granpapa (nono), sovrebiviente de la Shoa, ke avia murido poko antes. La gran-tia (ermana de su nono), Lena, tambien sovrebiviente, konto en kurto su estoria de ser deportados a Auchwitz, I ke salvo su vida en kantando. I a la fin Harris i su ermano se abrasan kon la tia, i todo esta amor I alegria.
Ma, antes de kontinuar lo ke vos kereo dezir, sera bueno si lo vesh este video (en inglez, siguro)
Es difisil entender de ande es ke fue deportada Lena. Solo en un momento eya apunta en una mapa, i la komentarista dize ke Lena fue deportada de una chikitika sivdad en Gresia (“a tiny town in Greece.”). Nunka se mensiono el nombre de la sivdad (Kastoria), ni el biervo Sefaradi, ni nada mas sovre Gresia, ni las alkunyas de Lena o de su defundo ermano. Ansina se pedrio otruna oportunidad de dar a saver sovre la sufriensa de los sefaradim en la Shoa.
No savemos los motivos de los responsables del program. Puede ser lo solo ke les enteresa es poder tokar la emosion del espektador, i no dar enformasion. Ma la realidad es ke, malorozamente, el inyorar o “mardjinar” los sefaradim aki en todo lo ke konserna la vida djudia es koza ke okurre regolarmente. El ser djudio es deskrivido, rekonosido, I reprezentado – en livros, artikolos, medios de komunikasion, i muzeos – solo en sus formas ashkenazis. Siguramente ke los ashkenazim konstituen la grande mayoridad de la povlasion djudia. Si alguna muzika o komida sefaradi atira la atension, es solo por ser “egzotika.” Nada, o muy poko, toparash sovre los sefaradim en el muevo muzeo djudio en Philadelphia (National Museum of American Jewish History – www.NMAJH.org ), i anda mas poko en kualker muzeo de la Shoa. Esto es un sujeto ke merese muncha diskusion, lo ke no es mi buto agora. Lo ke yo kero kontar es un poko de lo ke dezearia ver mensionado en el programa de television mensionado ariva.
Unos kuantos anyos antes, un konosido mio ke esta preparando livro sovre los djudios de Kastoria entrevisto a Lena Eliaou Russo (ke vimos en el video) i su ermano Beni Elias (el defundo nono de Harris.) Vos do unas informasiones kurtas de sus notas. Los djudios de Kastoria (Masedonia, norte de Gresia) fueron deportados en Marso de 1944, un anyo despues de los de Salonik.
Lena i Beni eran dos de los solo 35 personas ke kedaron bivos de la komunidad djudia de 850 personas. Sus padre, Calev Haim Eliaou, era el prezidente de la komunidad, I el proprietario del uniko molino para arina. Lena avia prezentado flores al rey George kuando vijito la sivdad. Todo tiempo ke Kastoria kedo en kontrol Italiano (asta sus kapitulasion Septembre 1943) todo iva bien. Los almanes empozaron sus restriksiones I las persekusiones, I finalmente el transporto de todos los djudios. Ma aki no avia treno, fueron yevados kon kamyones a Salonik, I ayi enkarserados en una presion por sesh dias antes de ser transportados a Auschwitz Birkenau. Munchos de los ke pudieron sovrebivir en los kampos murieron en la marcha de la muerte a la fin de la gerra. Beni fue mandado a Suedia a rekuperar. I ayi enkontro a un sovrebiviente de Salonik ke, por una koensidensia, era al primo ermano del ke lo entrevisto unos 50 anyos despues para su investigasion!
La grande piedrita en la Shoa mos desho kon un mundo Sefaradi muy chiko. Ma no podemos ni devemos kedar en las mardjinas del mundo djudio, porke semos parte integral de su estoria kompleta.
Rachel Amado Bortnick
Emótiva historia donde las haya, en efecto …
Quisiera en tal sentido,y a modo de «contribucion personal», adjuntar el siguiente texto,el cual se haya ubicado en el Museo Djudio de Salonic, y viene expresado en los siguientes términos;
«En 1941 la Grecha kayó a los almanes i sus aleados los italianos i los búlgaros, i el pais fue departido en tres zonas de okupasion .
Salonic basho los nazis kon su komunita de algunos 49000 djudios, no estava preparada para los orores de la solucion final
A la fin de 1945, solo un puniado de djudios kedaron, 95% de la komunita djudia de la svida fue eksterminada en los kampos de la muerte en Polonia…»
Gracias a Rachel Amado Bortnik, por las palabras que ponen fin a su relato, las cuales deben mover a reflexion, a cuantos amamos, la cultura sefaradi, y hacemos memoria de su historia …