En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Lucena, sivdad djudia de un tiempo

Pokos dias atras, Matilde Barnatan moz izo saver en Ladinokomunidad ke la sivdad de Lucena (Espanya) entro en la Red de Juderias (Djudrias), komo la 24ena sivdad en este grupo, kompuesto de sivdades rekonosidas por tener emportantes trasas (huellas) o restos arkeolojikos de la vida djudia ke egzistia ayi.  (En lo mas de estas sivdades oy no egziste ni un djudio!)  Komo savemos, Matilde dirije, djuntos kon su ija Rajel, la Emision Sefarad de la Radio Exterior de Espanya, i va avlar mas anchamente de este sujeto kon la responsavle de la munispiladidad de Lucena (Lara Cantizani) en sus emision «Sefarad» de lunes 11 de junio.  (Esto se puedra sentir en: Emisión en Sefardí: Lucena, nueva ciudad en la Red de Juderías

En las semanas pasadas ya estavamos tomando siertos avizos sovre Lucena, komo el ke aparesio en eSefarad (https://esefarad.com/?p=32221.)  Tambien en Febrero meldi un artikolo ke avlava de los sientifikos  de la universidad de Granada ke egzaminaron los dientes de los eskeletos en el semeterio djudio de la sivdad ande los para topar kualo komian estos djudios del siglo onze.  Toparon ke no komian peshkado (siguro, porke la sivdad es leshos de la mar!) ni karne (para no komer serdo?)  ma komian vedruras i trigo.  Ma lo emportante para mozotros es ke en este semeterio se topan dainda las tombas djudias, i ke, asegun mos eskrive Matilda, el Rav Moshe Bendahan, de la Komunidad Djudia de Madrid, i otros rabanim estan kolaborando kon las otoridades i espesialistos en la prezervasion I investigasion de estos emportantes restos en konformidad kon leyes djudias de respekto a los muertos.

Istoria

Lucena,  situada en la rejion de Andalusia, al sur de Cordoba, era verdadmente konosida komo «La sivdad de los Djudios» no solo porke tenia una komunidad de djudios emportante, ma se dize ke fue tambien fondada por djudios.  Lo ke es siguro es ke por muncho tiempo adyentro las murayas (fortifikasiones) de la sivdad bivian solo djudios, I los otros afuera.

Tenemos munchos testimonios istorikos mensionando los djudios de Lucena. El istoriano Abraham Ibn Daud (1110-1180) eskrive ke los djudios vinieron a Lucena de Bavel (Babylonia) en el tiempo del rey  Nabuccadnezar (6 siglos antes de la Era Komun!)  En el 9en siglo, el Gaon de Sura eskrivio ke en Alisana (nombre arabe de Lucena) ke todos los abitantes son djudios.  Al-Idrisi, el kartografo I viajador arabe del siglo 12,  eskrivyo ke los djudios moravan adientro i los arabes afuera de la sivdad, I ke los djudios de aki eran los mas rikos de kualker otra sivdad.

Asta la metad del 12en siglo, Lucena fue el sentro kultural del djudaismo espanyol.  Debasho la egemonia de los moros (muslumanos), los djudios de Lucena tenian munchas libertades  komo tambien en otras sivdades de “Al Andalus”.  Tenian sus tribunal aparte, ande el rabino elijido de la komunidad era el djuzgador (juez.)  Aki bivieron munchos emportantes personajes djudios, komo Isaac Ibn Ghayyat (la alkunya Bengiyat sera de aki?) profesor de yeshiva, ke eskrivyo la orasion de la Avdala de noche de Alhad.  Isaac Alfasi fondo  aki una akademia talmudika.  Mezmo el poeta famozo Yehuda Halevi estuvo aki por un tiempo.

La vida en paz turo asta el tiempo de los fanatikos governadores de la dinastia Almoravides, I despues los mas negros Almohades, ke persekutieron a los djudios i los forsaron a konvertirsen al Islam en 1146.

Munchos djudios de Lucena se fuyen al norte, al reynado de Navarre, i se arresentan en la sivdad de Tudela.  Ma aki okurre una koza muy enteresante, ke amostra la nostaljia de estos por sus vieja sivdad.  Los djudios muevos venidos le trokaron el nombre de Tudela: la yamaron Lucena!  Esto salio enmedio en unos dokumentos en ebreo de Navarre ande se mensiona la sivdad Lucena! (Mirad en el livro Tudela y Lucena ).

En 1240 Lucena fue konkistada por Castille (reynado Kristiano) I los djudios retornaron.  Ma las matansinas de 1391 i las konversiones forsadas trusho una destruksion final a esta komunidad djudia, ke nunka se rekupero.

Rachel Amado-Bortnick
Dallas – Texas
Ladinokomunita