eSefarad Noticias del Mundo Sefaradi
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
Ver todos los artículos de esta sección >>
La dulse estorya del harose(t)
Chiko i grande, a todos les agrada el Haroset ke metemos en la meza de Pesah. Kada uno lo aze a su manera, ma en jeneral es koza dulse i muy savroza.
Saviash ke en la Tora no avla de Haroset, ni mos da un mandamiento de komer haroset en Pesah? Ni tenemos beraha para haroset. Aun kon esto, la tradision es muy antigua. Por primera ves se mensiona en la Mishna, livro de la ley «por boka» transkrito en el anyo 200 de la era komun. En deskriviendo lo ke se mete en la meza del «seder» de Pesah, dize: «ma[t]sa, lichuga, i haroset, aun ke haroset no es un mandamiento.» Algunos dizen ke es la influensa del uzo de los gregos antiguos, ke en deskutiendo temas filozofikas, untavan kozas de komer en una meskla de muezes i espesias. (Kuriozo, en el haroset ke ago yo no ay ni muez, ni espesia!)
Los rabanim siguro toparon razones relijiozas para tener el haroset en la meza la noche de la agada. La sinyifikasion simbolika ke mensionamos siempre es ke mos aze akodrar de la meskla ( «mortar» en inglez; en ladino uzavamos «siva» del turko; veo ke es «lechada» en espanyol) ke se mete entre los ladriyos en fraguando paredes. Esto porke el biervo haroset asemeja a «haras» en ebreo, ke es barro. Ma fue el Rambam (Maimonides) ke dio una de las primeras rechetas de haroset, en diziendo ke kale ke pareska a barro mesklado kon paja (straw en ing.). «ahajar datiles, igos, pasas, i semejante…, adjustar vinagre i mesklar kon espesias.»
Una ves, unos soldados norteamerikanos djudios ke se toparon en dizierto en Pesah, no podieron azer haroset, metieron un ladriyo en la meza (no lo komieron!) Ma ya savemos ke la dulsura del haroset ablanda la amargura de la lichuga (i sovre todo del ravano ke komen los ashkenazim por maror!)
El savyo Rabi Akiva, del siglo 2 de la era komun, eksplika la razon de untar el maror en haroset. Dize ke mos aze akodrar ke en el tiempo de la servitud en Ayifto, las mujeres djudias azian amor kon sus maridos en las guertas de mansana a las eskondidas, i kedavan prenyadas, en kontra del Paro ke las prohibia de prokriar. Rabi Akiva dize ke es grasias a estas mujeres valientes ke salvimos de muestro esklavaje. El tomo la idea del pasuk de Shir aShirim ke se melda en el Shabat de la semana de Pesah: «Debasho de la mansanera te desperti. Ayi tu madre te konsivio.» (No se los biervos egzaktos en ladino. Yo lo traduizi del inglez.)
Otro midrash del Talmud konta: Kuando los ejipsianos ke tratavan de matar bebikos judios, la tierra englutiiya a los bebikos! I kuando los ejipsianos se ivan, los bebikos saliyan de la tierra komo plantas vedres freskas. Una enterpretasion de este midrash es ke ansina el Dio izo una jenerasion ke iva bivir en libertad. Otra es ke est midrash simboliza el renasimiento de la primavera de todo lo ke parese muerto.
Ansi ke el haroset puede simbolizar tambien la dualidad de nasimiento i muerte, liberta i opresion – lo ke ata la estorya djudia kon la estorya de la vida.
Bazado en un artikolo en inglez: http://www.momentmag.com/the-sweet-story-of-charoset/
(En este enlase verash varias rechetas para haroset, ma la mia no esta, ni la vuestra por siguro!)
Rachel Amado Bortnick
Dallas, Texas
