eSefarad Noticias del Mundo Sefaradi
Ver todos los artículos de esta sección >>
LA AKADEMIA DEL LADINO: informasiones i pensamientos
La Akademia de Ladino en Israel fue fondada el anyo pasado komo la 24en miembra de la Real Akademia Espanyola (Real Academia Española – RAE). Komo fonksiona esta Akademia, i ke sinyifika este paso para la lingua djudeoespanyola? Por la primera vez estas kestiones i mas fueron diskutidas publikamente en el Enkontro de Alhad via Zoom del 6 sept. 2020, kuando La profesora Dra. Ora Schwarzwald, prezidente de la Akademia de Ladino, era la musafira del Enkontro, kon el balabay Dr. Shmuel Refael, el sekretario de la dicha Akademia.
La RAE tiene miembras Akademias en kada pais del mundo ande se avla el espanyol. Israel fue eskojido para el djudeoespanyol porke es el pais ande biven los mas munchos avlantes de la lengua. La Dra. Schwarzwald mos konto por los lavoros desdel anyo 2016 para realizar la formasion de la Akademia de Ladino, i mos informo sovre la organizasion, la direksion, las reglas, los butos, los miembros korespondientes, i mas. La Akademia de Israel kolabora tambien kon la Autoridad Nasionala del Ladino (ANL) de la kuala resive apoyo finansial, siendo ke la RAE no da ayudo monetario a dinguna de sus miembras Akademias.
Aki no es mi intension de dar un resume de todas las interesantes informasiones ke tomimos, si no ke notar unos pensamientos sovre el tema. (Todo el ke no vido el Enkontro en bivo puede topar su gravasion en: https://www.youtube.com/watch?v=fMGcDVvEuLE )
Valor i prestijio a muestro espanyol
Por seguro ke ser rekonosida por la RAE komo lingua espanyola traye un sierto prestijio a muestra lingua, i amostra su valor i emportansia. Esto mos trae orgulyo a mozotros los ke la avlamos. Ke ironia para la djente ke, desde munchos anyos atras, la menospresyavan asta propozar ke devemos de abandonarla!
Mos ambezimos tambien ke la kreasion de la Akademia de Ladino metio muestra lingua en un lugar improtante en la ierarkia de linguas en Israel. Las unikas linguas en Israel ke tenian Akademias asta agora eran las dos linguas ofisiales del Estado: el ivrit i el arabe. Ansi ke la Akademia del Ladino es la sola de una lingua ke no es ofisiala en Israel, i ke ademas, tiene muncho mas pokos avlantes de lo ke tiene el Yiddish, por egzemplo! Esto es, para mozotros, no solo de alegrar ma de sintir orgulyo tambien, kon agradesimiento a muestros amigos akademikos del ladino en Israel.
Ortografia i el uzo de eskrivir
La profesora Scwartzwald mos disho ke la Akademia ya kumplio uno de sus butos, el de estableser un ortografia uniforma para eskrivir el ladino en letras ebreas. (No fue menester de estableser reglas de ortografia en letras latinas, porke komo la ANL de la kuala aze parte la Akademia adopto las reglas establesidas por la revista Aki Yerushalayim.) La idea es de estableser una pajina en Facebook ande la djente pueden eskrivir en ladino kon letras ebreas korektamente. Ma komo se puede asegurar ke las reglas se van a segyir, o mizmo ke el kontenido de las komunikasiones van a ser en ladino? La repuesta del profesor Refael es ke esto no se puede asegurar.
Esto es muy diferente de Ladinokomunita, ande tenemos moderadores ke kontrolan kada mesaj para asegurar ke sea eskrito en konformidad kon las reglas de Aki Yerushalayim, i siguro, ke kada mesaj sea en ladino. En Ladinokomunita tuvimos miembros de mas de 40 paizes, kon munchos miembros de Israel tambien. Esperamos ke la Akademia, en su promosion de eskrivir ladino kon letras ebreas, no va impedir la kontinuasion de las amistades ke tenemos entre los ladino avlantes de Israel kon los del resto del mundo.
Konkluzion
Esperamos ke todos los butos de la Akademia de Ladino se van a realizar kon tiempo, sovre todo el de krear un diksionaryo de ladino kompleto – ke tanto lo tenemos menester!
El atajido kon la RAE es un paso grande en el rekonosimiento de la lingua djudeoespanyola por el grande mundo espanyolparlante, i avre la puerta para el entereso del mundo entero. Lo mas importante es asegurar ke la lengua kede komo lingua biva, avlada i eskrita, i no solo para investigasiones akademikas.
Oguramos reushita kumplida a la Akademia de Ladino en Israel, i felisitamos a todos los ke lavoraron i estan lavorando por eya.
—————-
Rachel Amado Bortnick – Dallas
