En vista de Rachel: KIPUR: SENTIMIENTOS KON MEMORIAS

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.  
 

KIPUR: SENTIMIENTOS KON MEMORIAS

Dizen ke la persona se akodra solo las kozas ke a su tiempo le evokaron sentimientos profundos.

En eskriviendo estos biervos djusto antes de Kipur, me topo kon mis memorias de este dia sakrado en el pasado, i en partikolar de dos, uno en 1973 i otro en 1992, ke fueron muy emosionantes por diferentes razones.

En 1973 biviamos en St. Louis, Missouri.  Mi papa murio en Febrero de akel anyo en Izmir,  Turkia, i al enverano mi mama vino a pasar unos mezes kon mi i mi famiya en la Amerika.  En dia de kipur, mos fuimos a la sinagoga, i durante el servisio, en supito el rabino se kedo en medio de la orasion, i kon kara palida, anunso ke Israel fue atakado por Ejipto i Siria.  En primero kedimos todos kayados, komo ke mos avia kayido un tono de buz (yelo) en la kavesa, i estavamos en shok  i despues empeso un ruido de todos avlando en una.  “La Amerika kale ke ayude a Israel, los rusos van ayudar a los arabes,” “es ke esto sera el empesijo de una otra gerra mundial?…” 

Me akodro la pezgor en muestros korasones, i el sentimiento de unidad kon Israel en akel momento de amenaso a muestro puevlo. 

1992, komo ya savesh, era el kinsentenario de la ekspulsion de muestros avuelos de Espanya i de sus arivo en tierras del Imperio Otomano.  A esta okazion, mi marido i yo izmos un tur ekstensivo en Turkia, i yegimos a Izmir, mi sivdad natal,  djusto antes de Rosh Ashana.  En la fiesta fuimos a la kehila (el kal, la sinagoga) Bet Israel, ande mos aviamos kazado en 1960.  Por las emosiones i la nostaljia de Rosh Ashana en Izmir akel anyo, ya tengo eskrito en anyos pasados.  Agora vos kontare por Kipur.

De Turkia, Bernard fue ovligado de aboltarse a la Amerika, a su lavoro.  Ma yo me fui a Israel para ver a mi ermano Selim ke bive ayi, i es ayi ke me apersivi de lo ke es dia de Kipur en Israel.

No era la primera ves ke vide Kipur en Israel. Yo avia bivido ayi dos anyos, de 1962 a 64.  Ma entonses no me avia impresionado tanto, puede ser porke me avian impresionado tantas kozas ayi, o puede ser porke estava preokupada kon mi muevo bebe (mi ijo grande, Avi, ke nasyo ayi.)  Ma agora, 30 anyos despues, vide todo kon otros ojos.

La demanyana de Kipur, me fui kon Selim al kal de los turkanos en Kiryat Ono, i siguro mos fuimos a pie.  Lo ke vide en el kamino indo i viniendo fue una shena ekstraordinarya!

En las kayes no aviya ni un otomobil, ni un otobus, ni dingun sinyo o ruido de este djenero de vehikulos en dingun lugar.  La djente estavan kaminando, las kriaturas djugando i koriendo enmedyo de la kaleja! Ijikos i ijikas estavan en bisikleta, o djugando, o kaminando kon sus famiyas.  Madres djovenas yevavan a sus bebes en karosikas, en brasos, o de mano;  mujeres i ombres avlavan en kaminando, i todos paresian ser kontentes de la vida.  El tiempo estava ermozo, i las flores i los arvoles  briavan dainda kon kolores luminozas debasho los rayos del sol.  La sivdad se avia transformado en un parko! Por un dia el pais entero se avia transformado en un parko!  Esto no egziste en dingun otro lugar del mundo  Esto es lo ke kijo dizir el bivir en un pais djudio!

Kada Israeli respekta el dia de Kipur, mezmo si es para no ofender al vezino.   Los relijiozos i lo mas de los non-relijiozos azen tanit (ayunan) en Kipur, no uzan elektrisita o fuego, no lavoran, i no se van en otos. Los magazenes i restorantes son serrados, i no ay dinguna manera de negosio.

La gerra de Yom Kipur en 1973 avia kostado miles de almas.  Es siguro ke los enemigos de Israel desidaron de atakar en akel dia porke savian ke Kipur es el dia mas sakrado de los djudios, kuando Israel entero keda de lavorar, i munchos soldados se van a sus kazas.

La fiesta de Kipur tura unas 25 oras, i se eskapa en la noche kon la Tekia Gedola (el grande sonido) del Shofar.  Despues, en Israel todo se torna a lo normal, i todo el ruido, el trafiko, i el negosio de las kayes – asta el proksimo Kipur.

Oguramos ke seyga un anyo de pas i trankilida en Israel i en el mundo, i de kontentéz i alegria en muestras kazas i muestros korasones.