Izmir se «desperto!» por Rachel Amado-Bortnick

Ver todos los artículos de esta sección >>

Komo ya savesh en Izmir kedaron muy pokos djudios.  Ma aun kon esto, i puede ser por esta razon, los ke kedaron ayi, i sovre todo los mansevos i las mujeres, se organizaron para prokurar los menesteres de la komunidad, mantener sus tradisiones i institusiones, i dar a konoser, i mezmo salvar por siempre, sus istoria i kultura.

Puede ser ke el mas konosido de estos esforsos es el de restorar las sinagogas viejas de la seksion  ke yamamos “la djuderia” en el sentro de Izmir. (Tuvimos a Nisim Bencoya, el direktor del projekto, komo musafir en dos Enkontros de Alhad.)

Ma ay muncho mas ke no es konosido.  I entre estos el mas muevo projekto es el sitio de izmirjcc.org ke esta en version en inglez tambien. (izmirjcc.org/eng).  Vos rekomendo de ir ayi i ver lo bueno ke toparesh!

 

La primera koza ke vash a ver es ke el titolo del projekto es “Despertar Izmir”.  Verdad ke es esto ke tenia menester Izmir!  En mi tiempo eramos una komunidad grande ma muy asolada, kon poka komunikasion (i puede ser sin dinguna komunikasion) kon el mundo djudio o non-djudio afuera de muestra komunidad.  Agora tenemos menester de konoser i ser konosidos.

Felisitasiones al manseviko Ceki Hazan ke se enkargo de este maraviozo lavoro!

Saludos a todos,
Rachel

________________________

Rachel Amado Bortnick – Dallas
Ladinokomunita