En vista de Rachel: Imigrasion de Anusim o Conversos al Imperio Otomano. Primera partida: Los Amados, de Bayonne a Izmir

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Imigrasion de Anusim o Conversos al  Imperio Otomano.
Primera partida: Los Amados, de Bayonne a Izmir

Kuando se trata de anusim (“forsados” en ebreo,  designasion de djudios konvertidos al katolisizmo por fuersa en Espanya o Portugal) meldamos, sintimos, I vemos muncho sovre sus venida al “mundo muevo” (las Amerikas i las islas del Karibe) en el siglo 16, ande munchos de eyos I sus desendientes kedaron komo  “kripto-djudios,” djudios eskondidos, sigyendo algunos rituales en sekreto en sus famiyas,  a vezes sin saver la razon.  Por esto, I por ser akuzados de ser “judaizantes” savemos ke algunos fueron kemados por los tribunales de la  Inkizision establesidos aki.

Siguro savemos tambien ke los sefaradis portugezes en Olanda avian sido anusim en Portugal, i/o en Espanya, ke algunos de estos se fueron de Olanda a  las Amerikas tambien, o a Inglitierra.  Eran de este grupo los primeros djudios (“aviertos”, no eskondidos) ke yegaron al kontinente amerikano, en primero a Recife (en Brazil) I despues, kuando Recife paso al dominio Portugez,  23 de eyos yegaron al norte Amerika, lo ke es agora New York.

Ma lo ke no es tan bien konosido, es ke en los mezmos anyos – empesando poko despues de la Expulsion de 1492 I turando a lo menos 100 anyos mas – anusim estavan tambien viniendo al Imperio Otomano, ande pudian praktikar sus fe djudia aviertamente.   No me refiero a personas emportantes komo la inkomparavle Dona Gracia Nasi, o su sovrino Joseph Nasi, ke ya son bastante konosidas, ma a personas mas ordinarias ke pueden ser, i probavlemente son, proprios avuelos muestros, los sefaradis de oy.

Una prova ke t konversos kontinuaron a venir en grupos grandes I chikos al imperio turko, es ke el sujeto se trata anchamente en  las responsas (opiniones eskritos de rabinos en repuesta a kestiones o problemas) del tiempo.   Munchas de estas ya se tienen publikado, inkluyidas en livros, ma se pueden topar dainda mas.  En los ultimos anyos, mi amiga Dina Eliezer topo munchos manuskritos tratando de esto en su lavoro de areglar la biblioteka de livros antiguos en la komunidad djudia de Izmir)

Los Amados, de Bayonne a Izmir

La famiya de mi papa, los Amados, eran venidos a Izmir de Bayonne (en Fransia.) Por esto en las “kapitulasiones” otomanas (kontrato de privilejios akordados a los paises evropeos partikolarmente a Fransia)  eyos pudieron tomar la nasionalidad franseza ke les dava otorizasion de ser “protejados” por el governo fransez, o sus reprezentantes, en Turkia.  Otros tambien de esta manera tomaron nasionalidades espanyolas, o Italianas.     (La nasionalidad i “proteksion” franseza no sirvio nada para mi tio, Avram Amado, ermano de mi papa, ke fue tomado a la armada otomana en la primera gerra mondial, a nunka tornar.  Ma esto es otra istoria.[1])

Ma deke, I de ande se avian ido a Bayonne los Amados? I kuando vinieron a Izmir?  Esto no savemos, ma mos podemos imajinar.

Lo ke ya savemos es ke Bayonne (Bayona, en espanyol) era una komunidad de ex-conversos, fuyidos de la Inkizision de Espanya i/o Portugal.  Komo “Kristianos Muevos” en 1550 resivieron otorizasion de aresentarsen en la sivdad, ma los komerchantes otoktonos kristianos no les permetian a estos refujiados (ke por siguro los konsideravan djudios)  de okuparsen de komersio lokal.  Al pareser a kavza de sus inimistad, en 1636 unas kuantas famiyas djudias fueron ekspulsadas de la sivdad.  Aun ke ofisialmente la komunidad no fue rekonosida komo djudia asta 1723, ya avia desde los 1650s una kehila (kongregasion) yamada Nefu?ot Yehudah («Los esparsidos de Yehuda” ) i en 1660 se avrio el semeterio djudio.    En el empesijo del siglo 18,  se topavan solo 700 djudios en Bayonne,  ma en 1753 la komunidad ya avia kresido a unos 3500.   En este tiempo los djudios de Bayonne intodusieron a Fransia la industria de chokolata!  Eyos fueron entre los primeros de azer komerso kon las islas fransezas de los Antilles.  Malgrado la inimista de sus kosivdadinos kristianos, partisiparon en las eleksiones de 1789 I fueron rekonosidos komo sivdadanos fransezes en 1790, djudntos kon los djudios “portugezes, espanyoles, I avignonezes” de Fransia.

En akeyos anyos savemos ke los Amados ya estavan en Izmir.  Un granrabino de Izmir fue Rav David ben Yaakov Amado (1777-1832) ke era biznono de mi nono.

Entonses es posible ke los Amados yegaron a Izmir de muncho tiempo antes, I ke posiblemente salieron de Bayonne en 1636, kuando fueron ekspulsaradas algunas famiyas (seria la muestra una de eyas?) I vinieron a Izmir despues de un viaje largo I duro.  Puedo solo imajinarme ke si esto fue el kavzo, ke diziluzion pasaron pokos anyos despues, en 1648, kuando salio el grande eskandalo de Sabetay Sevi,  ke se deklaro “Mashiah” en Izmir!

(A la proksimas partidas:  Reprezentasion de Anusim en dos novelas djudeoespanyolas.)

Rachel Amado-Bortnick
Dallas – Texas
Ladinokomunita