eSefarad Noticias del Mundo Sefaradi
Ver todos los artículos de esta sección >>
Nunka mos olvidaremos de la Nona Flory, ke repoze en Gan Eden.
-.-.-.-.-.-.-.-.-.-.-.-.-.-.-.-.-.-.-.-.-.-
La kerida “Nona” Flory Jagoda, murio en repozo a la edad de 97 el 29 enero, 2021 en Alexandria, Virgina, EE.UU. Flory Papo Kabilio Jagoda, nasida en Sarajevo, Bosnia en 1923, es konosida komo The Keeper of The Flame (la Guarda de la Flama) por su dedikasion a las tradisiones sefaradis i a la memoria de su kerida famiya Altaras ke fue asasinada en Vlasenica, Bosnia, durante la Segunda Gerra Mundiala.
Flory era kantadera sovresaliente, kompozitora kreativa, interpreta fasinante, i kontadora enkantadera de kuentos. Fue onorada por munchas organizasiones, komo el National Endowment for the Arts i el Virginia Foundation for the Humanities. Tambien resivio el US Immigrant Achievement Award (premio de logro de emigrante a EEUU.) El video de la entrevista en el Muzeo del Holokosto en Washington, dos filmos dokunetarios (The Key From Spain, Flory’s Flame); el livro infantil yamado The Key From Spain (la yave de Espanya) i los kantes en su 5 CDs, kontan su eksperiensa durante la Sigunda Gerra Mundiala, i la muzika ke fue parte de su ekstraordinarya vida.
Durante su estansya en Bari, Italia, komo refujiada de la gerra, Flory se enamoro del ofisier amerikano Harry Jagoda, se kazaron en junio 1945 i enjuntos vinieron a l’ America en 1946, pais ke amo el resto de su vida. Engrandesya a su famiya komo Amerikanos, i fiestava kon grande gusto el 4 de Julio, dia de la independensia amerikana, i otras fiestas tambien, kon munchos invitados ke tanyian sus instrumentos muzikales, i todos kantavan i baylavan. Mientres ke engrandesia su 4 kriaturas, Flory pintava i dava lisyones de gitara, akordeon, i piano, i la kaza estava yena de muzika de varios jeneros, inkluyendo klasika, folklorika amerikana, rock-and-roll, i kantes bosnianos i kantes sefaradis.
Flory se izo muy famoza en el mundo por su kompozision de Hanuka Ocho Kandelikas, i dio munchos konsertos komo solista i konferensias sovre muzika sefaradi, i tambien kon sus ijos i otros kolegas muzikales. Nona Flory fue la fondadora del Jewish Folk Arts Society i de las Vijitas de Alhad, reuniones mensuales de djente sefaradi-otmana para avlar en ladino i prezervar su tradisiones. Su ovra de vida fue de kontinuar i dar a konoser la ermozura emosionala de la muzika i lo ke se ambezo de su propria Nona, i prezervar la kultura sefaradi ke eya amava tanto.
Flory pedrio a Harry, ke fue su marido por 69 anyos, i a sus ijo, Elliot, en 2014,. Eya va kedar por siempre en la memorya de todos los ke la konosieron, i espesialmente sus ijas, Betty Jagoda Murphy (Greg Murphy) i Lori Jagoda Lowell (Jeremy Lowell), su ijo Andy Jagoda (Silvana Riggio), prima, Berta Altaras Silverstein (Barry Silverstein) i elmuera, Evie Jagoda. Nona va bivir kon amor en los korasones de su keridos inyetos: Josh Murphy (Meghan Murphy), Ian Lowell (Alysia Lowell), Ariel Lowell and Alec Lowell (fiancé Sasha), Aaron Jagoda (Justinn Jagoda) i Nathan Jagoda i las estoryas de Nona Flory va perpetuar su memorya en su bizinyetos Liam i Flory Murphy, Cooper Lowell i Ellis Jagoda. Todos los miembros de su famiya Jagoda, suvrinas i suvrinos, ansi ke sus kolegas de muzika, sovre todo Susan Gaeta, Aviva Chernik i Howard Bass, van onorar su memorya kada vez ke kantan una de su kantikas, o kontan un kuento sovre Nona Flory.
Ay muncho mas de dizir sovre esta mujer ekstraordinarya ke afrontava el mundo kon determinasioni serenidad i respondia a todas las demandas de vida kon muzika i kon su korason… “kun Salud i Buena Vida.”
El funeral via Zoom, i orasiones de los siete dias se van anunsar serkamente.
Donasiones en onor de Flory se pueden azer a:
Flory Jagoda Sephardic Music Fund
Virginia Humanities
145 Ednam Drive
Charlottesville, VA 22903
O via este atadijo de internet: https://virginiafolklife.org/give/flory-jagoda-sephardic-music-fund/
—————-
Rachel Amado Bortnick – Dallas
