eSefarad Noticias del Mundo Sefaradi
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
Ver todos los artículos de esta sección >>
El Kantor Salonikli de Belin: Estrongo Nachama, z.l.
Kuando el presidente Ezer Weizman de Israel vijito Almania en 1996, disho ke no podia entender deke djudios dainda bivian en este pais. Entonses Estrongo Nachama, el famozo kantor de Berlin, avia dicho ke esta remarka es un ensulto a la Almania moderna, I enforteze el sentimiento de izolasion de los sovrebivientes de la Shoa ke kedaron en el pais.
Dainda oy munchos demandan deke un djudio eskoje de bivir en este pais, la kuna del Holokausto/ la Shoa – sovre todo un djudio ke sovrebivio del gehinam de los kampos, komo el hazan Nachama el mezmo!
I ademas, un sovrebiviente sefaradi de Salonik, komo Estrongo Nachama!
En pasadas, Sam Hassid (de Israel) izo la demanda en el sigiente mesaje a Ladinokomunita:
El sinior Estrongo Nahama (1918-2000) sovrebivio Auschwitz (no. 116155) ma mucho tiempo era kantor en una sinagoga de Berlin. Lo puedesh sintir aki:
Para mi (i munchos otros) no se puede entender de ke Jidio ke sovrebivio Auschwitz ke de todas las sivdades del mundo biva en Berlin -ma todo tiene su eksplikasion…
Este mesaje me desperto la kuriozidad. En primero sinti sus kantes mezo el Internet. Kantava la liturjia al stilo ashkenazi, ma ke maravioza, fuerte boz bariton! Despues me fui a ambezarme mas sovre el.
Estrongo Nachama nasio en Salonik en el 4 mayo 1918, ijo de Menahem Nahama i Oro Nahama, famiya sefaradi kon antepasados ke fueron hahamim I savios del Talmud. Estrongo estudio en eskola primaria djudia, I eskola franseza; lavoro en el negosio de su papa, ke era komersiante de trigo, I kon su ermoza boz se izo tambien hazan. Los Almanes en Gresia en 1941, I en la primavera de 1943 el i su famiya entera, komo todos los djudios de la sivdad, fueron deportados a Auschwitz. Tenia el numero de prisonero 116155 en su braso. Sovrebivio a kavza de su ermoza boz, ke presto los nazistas la deskuvrieron I les agradava sintirla. Lo yamavan «singer of Auschwitz.» Ma toda su famiya fue matada (sus paryentes, ermana, i otros.)
Despues de 18 mezes en Auschwitz fue transferado al kampo Sachsenhausen, serka de Berlin, i por la fin de la gerra estuvo en la «marcha de muerte.» Fue liberado por soldados rusos en 5 de Mayo de 1945, dia ke el konsidero komo su “segundo nasimiento.” Una famiya kristiana lo kudio para rekuperarse del tifo ke tenia. Kuando se sano, perkuro de irse a Salonik, ma no pudo, I finalmente, siendo ke no le kedo ni famiya ni propriedad en Gresia, desido a kedar en Berlin, kon la famiya ke lo avia kudiado, i tomar parte en la rekonstruksion de la vida djudia de la sivdad.
De los 160000 djudios ke avia en Berlin antes de la gerra, avia kedado solo unos 7000. Algunos de eyos avian sovrebivido la gerra en eskondiendosen, i algunos, komo Nachama, sovrebivieron los kampos i kedaron en Almania komo “personas desplasadas.”
Kon su ermoza boz, el fue elejido hazan. Ma siendo el solo sefaradi en este ambiente ashkenazi, fue ovligado de ambezarse las melodias ashkenazis de la liturjia, I la pronunsasion ashkenazi del ebreo. Su boz se izo famoza en la sivdad, i era transmetida las noches de Shabat por la radio en el sektor amerikano . Tambien, no solo ke dirijiya servisios relijiozos para los soldados djudios amerikanos, ma grasias a su nasionalidad grega, podia entrar al Berlin del este (East Berlin) i dirijir los servisios en la sinagoga de ayi. Se kazo kon Lilli, ke avia sovrebivido en la rezistensia.
Izo su gran fama komo kantor en el kampo internasional tambien, enrejistro munchos diskos, i dio konsertos en Israel, Evropa i Amerika. Mezmo tuvo chika parte en un premio de Oscar, por su kurta aparensia en el filmo “Cabaret” kon Liza Minnelli I Joel Grey.
El hazan Nachama lucho siempre para promover buenas relasiones entre djudios i kristianos. Uno de sus kavos konsertos fue en el Katedral de Berlin. En septembre de 1999, kuando Ehud Barak, el primo ministro israeli, vijito Alemanya, el Sr. Nachama estava a su lado en un servisio en el kampo de konsentrasion Sachsenhausen, i lanso su ermoza boz sovre akeya shena yena de negras memoryas.
Su legado de lavor por el djudaismo kontinuea kon su ijo I inyeto. Su ijo Andrea es jurnalisto, i rabino de la sinagoga Hüttenweg en Berlin. Su inyeto (ijo de Andrea) Alexander Nachama se inauguro oganyo komo rabino de la rekonstruida kehila de Dresden, Almanya.
Estrongo Nachama murio en 13 enero de 2000, i fue enterrado en el semeterio djudio de Berlin, kon la asistensia, entre otros, del mayor de Berlin Eberhard Diepgen I del Rabino Yitzhak Ehrenberg. El Rabino Eherenberg disho ke el hazan Nachama, kada ves ke meldava la orasion por muertos, mensionava los 6 milyones ke fueron matados en la Shoa I dizia los nombres de su mama, papa, iermanas.
La povlasion djudia de Berlin pujo de 7000 a 12000 almas durante la vida del hazan Nechama. Oy ay unos 30000, entre eyos unos 15000 Israelis.
——
informasiones de los sigientes manaderos:
– http://www.nytimes.com/2000/01/17/world/estrongo-nachama-81-dies-chief-cantor-of-berlin-s-jews.html
– http://www.timesofisrael.com/dresden-to-get-its-first-own-rabbi-in-75-years/
– http://de.wikipedia.org/wiki/Estrongo_Nachama (kon el ayudo de «google-translate.»)
– http://www.juedische-allgemeine.de/article/view/id/12925
– http://www.jweekly.com/article/full/12470/cantor-who-led-berlin-s-jews-for-past-50-years-dies/
– http://www.economist.com/node/276155
– korespondensia kon Samuel Hassid de Israel.
Rachel Amado-Bortnick
Dallas – Texas
Fondadora de Ladinokomunita
