En vista de Rachel: «Dos Sapatikos», poezia de Elie Perahya, z»l

Ver todos los artículos de esta sección >>

_________________________________________________________

«Dos Sapatikos», poezia de Elie Perahya, z»l

Viendo la eskulptura de los “sapatos” (en Izmir dizimos “chapines”) de fierro en la oria del Danube ke mos mando Guler, me izo akodrar de esta poezia del deskansado Elie Perahya de bendicha memorya ke avia guadrado yo (ma aki trata de lo ke vido en Auschwitz, kuando estavamos ayi en djuntos para la instalasion de la tabela en djudeoespanyol en el monumento de ayi):

DOS SAPATIKOS
Por Elie Perahya, de retorno de Auschwitz

Enserrados en una vitrina
Dos sapatikos
En el frio i la soledad,
Komo dos guerfanikos,
Me kontan sus istorya.

Es kon alegria ke fuimos eskojidos
Entre syenes i syenes de sapatikos
Para de bebikos los primeros pasos.
Ansi kon amor, entrimos
En la kaintor de una famiya.

En el korso de los dias, en supito,
Nuves pretas taparon el sol,
I en tinyevlas se troko,
La luz del dia.

Agora,
Ke bushkamos aki?
Entzados debasho estos vidros.
Puevlos pasan i mos miran
Komo objektos estranyos.
Mujeres eskonden sus lagrimas.

De la mano del artizano
Salimos mozotros,
No para devenir
Objektos de Muzeo.

Kitadmos de aki!
A muestra kaza keremos aboltar.
Muestros bebikos keremos topar.

Ande estan eyos?
Ande estan?
Ande?

(tomado del Şalom, 30 Nisan 2003)

Rachel Amado Bortnick
Dallas, Texas
Ladinokomunita

______________________________________________________________

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.