eSefarad Noticias del Mundo Sefaradi
Ver todos los artículos de esta sección >>
_________________________________________________________
DIdL i Kultura Sefaradi en Dallas
Me parese ke vinyeron unas 80-90 personas a muestra selebrasion el alhad pasado en SMU, ke para Dallas es una reushita grande. Ma la mas grande prova de reushita fue las munchas alavasiones i felisitasiones ke resivimos despues por el program entero.
La primera parte fue las tres konferensias kurtas: la mia sovre mis dos papus, la de Sarah Korman sovre memorias de su chikes komo sefaradiya en Portland, Oregon, i la de un amigo (M.E. Rios) de desendensia de anusim sovre el proseso de resivir la soditansia espanyola (i el pasaporto).
Muestro amigo Alejandro Acero iva tener una sesion espesial ma la sakrifiko (la aregalo a mozotros tres) para ke tengamos tiempo de responder las demandas de la audiensa. El i su mujer Dori se okuparon de filmar todo, i tambien de avrir el foro de Internet para los ke sigian el program en bivo, lo ke les dio oportunidad a eyos de demandar kestiones tambien. (Un proseso tekniko ke yo no entiendo!)
Despues uvo en entre-akto kon kafe i dulserias sefaradis kasher enkomendas de New York, i despues un maraviozo konserto de Michelle Alany asistida kon muzikantes lokales, inkluyendo la profesora Shira Lander en violon (Eya es la direktora de estudios djudaikos de SMU ke kada anyo mos ayuda a realizar el program de DIdL, i en su manseves era violonista profesionala.)
Algunos de los ke sigyeron el program en bivo se kesharon ke fue todo en inglez. Tienen razon, ma aki es imposible azerlo en ladino, porke no ay mas de 5 personas ke entienden muestra lengua!!! Aun kon esto, Yo i Sarah metimos unas informasiones en i sovre ladino en muestras konferensias.
Alejandro se okupo tambien de meter el filmo editado en Youtube i la kanal de Ladino 21. Ma entre mientres, si vos enteresa, podesh ver el video ke travo mi ijo Sam de mi konferensia en Youtube:
Rachel Amado Bortnick
Dallas, Texas
Ladinokomunita
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
