eSefarad Noticias del Mundo Sefaradi
En el Mes de la Cultura Judía Europea informamos sovre la Red de Juderías de España, kon la entrevista a su Director Iñaki Echeveste. En Septiembre, Mes de la Cultura Judía Europea basho la frase «El Pueblo del Libro» ofresemos programas espesiales de aktualitá en el universo Sefarad. Mos aserkamos a konoser las aktividades i enkontros más importantes en la Red de Juderías de España: Zaragoza, Tudela, Cáceres, i más sivdades de las 21 ke apartienen a esta Red Kultural, de la mano de su Director. Entrevista a Iñaki Echeveste ke mos kontará sovre ke akontese oy día en las Djuderías de Sefarad, tokando los temas de aktividades, muevos deskuvrimientos arkeolójikos i destakadas notisias. Iñaki mos prezenta un muevo proyekto dijital «Phygital» para el turismo en la Red de Juderías, este muevo proyekto adjunta patrimonio, teknolojía i vishita turístika en tiempo real, kon el apoyo del programa Experiencias Turismo de España. Indemás avlamos sovre la importansia de la kultura i patrimonio material en Sefarad i sus Djuderías, espasios para la kultura sefardí, aktos i aktividades. Kurunamos el programa kon el kante tradisional «Con muncha licencia» en la interpretasión de Ángel Carril. La aktualitá sefardí, agora i siempre en tu programa Emisión Sefarad.
________________________________________________
Muevos orarios emisión: Domingos 09’30, Lunes 12’05, Lunes 22 hs. (Onda corta), España
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
