eSefarad Noticias del Mundo Sefaradi
Selevramos el Día Internacional de la Mujer. La mujer sefardí, arte en la vida i en la literatura oy. Ofresemos un programa selevrando a todas las mujeres, en espesial kompartimos informasiones sovre presonalitades de mujeres sefardim en el mundo del arte poétiko kontemporáneo, ansí komo kantes en las bozes de kantaderas. En Istoria, investigasiones de Matilda Gini Barnatán, ke mos komparte su temátika «La musher sefardí, su fuerza en el rol de transmisora de kultura i lingua» i «La fuerza de la mujer desde los manaderos Bíblikos a la tradisión de kaza», mos adentramos en el mundo de la mujer komo presonaje en la konservasión de la lingua i tradisiones en verso las djenerasiones del avenir. La poesía en este programa es dedikada a la poeta sefardí Rita Gabbai. El Patrimonio muzikal se engalana kon kantes en sefardí sovre mujeres i sus estapas «A la una yo nasí» kante del siklo de la vida por la kantadera sefardí Esther Ackermann, el kante de bodas «Eskojiendo Novia» de los sefardim de Oriente i un kante dedikado a la mujer «Klara sos como el sol» en la boz de Ángel Carril. Kontinuamos kon kantes kontemporáneos onde se reflekta la valor de la mujer «Las Tiyas» de Flory Jagoda i «La Novia» de Viviana Rajel Barnatán. Kurunamos el programa kon la boz de unotra musher, la kantadera Marga Grajer ke interpreta el kante sefardí «La Kanariera».*
*Nota de la editora: Este tekso fue korikado a la eskritura de AK adopatada por la Autoridad Nasionala del Ladino
________________________________________________
Muevos orarios emisión: Domingos 09’30, Lunes 12’05, Lunes 22 hs. (Onda corta), España
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
