eSefarad Noticias del Mundo Sefaradi
En Israel, no mos enganyaremos de mozotros para mozotros, el Hamas malgrado ke fue vensido no desparesera de Gazza porke es kaji imposivle de eliminar una idea ke es bazada sovre una fervor relijioza, amenos ke no se elimine toda la djente ke se kreye en eya, lo ke asemeja imposivle. Mizmo si Trump fue kapache de aunir los governos evropeos i arabos, formar una koalisyon para eskapar el konflikto entre Israel i el Hamas i arivar ansi a un armistisyo no es seguro ke el Hamas esta pronto a entregarse totalmente en alevantando las manos.
De mi parte esto kontente de ver ke los arevatados bivos retornaron a Israel i ke puede ser ke la gerra entre Israel i el Hamas se kedara por un periodo de tiempo, kon un armistisyo garantizado por los payizes arabos de la rejyon i Los Estados Unidos de la Amerika. Espero ke el Hamas se va dezarmarse i ke los túneles yenos de armas serán destruyidos por la governansa ke se formara, lo esperamos en poko tiempo.
Por un kurto peryodo despues de aver liberado los arevatados i achetado las kondisyones del akordo de Trump, el Hamas sin respektar su sinyatura, ke poko le importa, puede de muevo ampesar su djihad kontra Israel. Pensar ke esto no es posivle es enganyarse de si para si. Difisil para el Hamas de deshar las armas i de deklarar al puevlo de Gazza ke esta pronto a azer la pas kon Israel. Basta de meldar la konstitusyon del Hamas ke kontiene las dichas del fundador de los Ermanos Muzulmanos Hasan El Banna ke avia dicho:’Israel egziste i kontinuara a egzistir fina ke el islam lo destruyera komo destruyo otros antes de el’.
El Hamas nunka se va ezvachearse ni abandonar este objektivo visto ke el es visto por sus miembros komo una ovligasyon relijioza. Por esta razón la lucha nunka se eskapara kon una negosyasyon de paz. Porke el Koran les komanda’ echaldos a akeyos ke vos echaron de vuestro lugar’. Para los muzulmanos fanatikos esto es el ekivalente de sus ‘torah’ ke les komanda de destruyir Israel. Komo se save la tyerra de Israel izo por un largo tiempo partida del imperio Otomano, el dalkavo kalifat i antes de el por el kalifat Abbasid. Koza ke sovre la iluminasyon teolojika del islam esta tyerra apartiene por siempre al islam i los muzulmanos son responsavles en frente de Allah de echar a los infideles ke la okupan. Esta responsibilita no es negosiavle del todo i mizmo si las kondisyones de un akordo son muy favoravles. El rezultado de este modo de lojika parese muy depresiva i no desha dinguna posibilita de arivar a un entendimiento.
Kissinger en 2006 avia eskrito ke el era konvensido ke es imposivle en esta parte del mundo de pueder azer pas entre los inimigos. Su lojika era, ke pas kere dizir uno ke gana i un otro ke perye la lucha. El remarko el fakto ke a munchos de los lideres arabos les gusta ser vistidos en uniformas militaras para mostrar fuerza i dominasyon en la rejion. El adjusta para pueder frenar las matansinas será mas realisto de tratar armistisyos de 25 a 50 anyos ke se repeteran kon muevas negosiasiones por muevas jenerasyones de lideres. Esto será puede ser el kamino de estableser la pas sin el Hamas, entre Israel i los arabos palestinianos.
La idea de insistir por el Hamas a ke sean liberados los terroristos sanginaryos famozos aprezados de munchos anyos, los kualos pueden en poko tiempo retornar a kontinuar la lucha kontra Israel en no respektando los akordos echos kon el plano Trump, mostra las malas intisyones de los dirijentes terroristos de esta entitad fashista i djihadista. Devemos ser muy akavidozos i pensar bien antes de achetar los akordos propozados por el Oksidente endjuntos kon los payizes arabos.
Si Israel oy no tiene otro agrado ke de achetar el akordo negosyado por el Oksidente kon sus haveres arabos, al mínimum deve ser atentivo i entender ke esto akordo de armistisyo puede ser djusto un muevo intento de reglar lo ke es insolvavle sin muncha esperansa. El leadership israeliano deve ser asigurado ke sus vizyones son klaras komo el kristal sovre el futuro de sus relasyones kon los vizinos poko sinseros.
Dr. Selim Salti
