eSefarad Noticias del Mundo Sefaradi
El enkontro de al kavo del Salon de Ladino tomo lugar en dia de Lunes 4 de Oktobre en la kaza de Margalit i Amos Weiss la fija de muestro moderador Yehuda Hatsvi.
En la marviyoza guerta de la famiya Weiss mos arrekojimos los miembros del sirkolo para tratar kestiones i trokar ideas ke se tratan al ladino, oyir konferesias de varias sujetos.
Los senyores Selim Salti i Besim Kohen mos prezentaron el programa
de la tadrada ke enkluyo dos konferesias de boka de los miembros, notisias i konversasion.
El primer konferesier fue el Dr. Yaakov Haguel ke mos prezento su muy entersante rezume de su akademiko lavoro sovre Shabetay Tsevi
a la kuala resivio el titulo akademiko Dr.
La segunda fue la amiga Simha Sade ke mos tomo sesenta anyos atras kon sus rekordos familiars del tiempo del los primeros anyos del Estado de Israel i los muevos imigrantes i sus vida en las MAABAROT (kazas de barakas), todo akompaniyado kon prezentasion de fotos en la komputadora.
Al kavo de las konferensias i las notisias, mos envitaron al bufe a gostar de los tratamientos delisyozos aprontados por Margalit, la balabya de kaza, i algunos de los miembros. Bendichas manos a todos.
Pasimos una tadrada muy agradavle. Grasias a los miembros de este magnifiko sirkolo ke me akseptaron komo amiga i me dieron la oportunidad adjuntarme kon eyos.
Grasias a las famiyas Weiss i Hatsvi por sus buena voluntad a resivirmos kon manos aviertas i kara buena en sus ermoza kaza.
Sara Sufrin Baruch de ISRAEL para Ladinokomunita, asperando kon kuriozidad al proksimo enkontro.
