EL DIA KE ISRAEL NASIO, EL VIAJE A TRAVES LA ISTORIA – Simon Geron

Keridos amigos i amigas, En el Jewish News de esta semana avia un monton de artikolos sovre el YOM ATSMAUT / El Dia de Independensia. Un artikolo titulado «Un Viaje A Traves La Istoria» presentado por Nathan Jeffay atiro mi atension. Eran los primeros tiempos del establesimiento del Estado Judio i yo tuve la okasion de ver kaji todo lo ke se pasava, indo ayi en las primeras oleadas de Olim. Me avian embiado a un Kibutz en la Galilea..Para mi esto fue una eksperiensia ke se kedo gravada en mi memoria asta oy despues de mas de 60 anios. Este artikulo me mostra la importansia de Galilea en el Movimiento del Kibutz.Se fueron ayi los mas grandes pionieros i idealistos para krear un Estado Judio Muevo i Moderno despues de 1900 anios.
Saludes a todos.

EL DIA KE ISRAEL NASIO

A las 04.00 de la tarde de Viernes el 14 Mayo 1948, 200 lideres Sionistos se enkontraron en el Salon de Tel-Aviv. Este enkontro ke era el primero i el ultimo evenemento termino kon la Deklarasion de un Estado Judio i Moderno. De esta djente no ay ninguno ke esta en vida oy ke puede kontar la istoria. El ultimo era Arien Handler i el se murio en 2011. 2 anios antes de su muerte konto lo ke se avia pasado este dia. El disho » Para mi la Deklarasion era el mijor dia de mi vida.Ninguno kreia ke puediamos azerlo.No saviamos tampoko si esto iva reushir.Ma ya izimos la Deklarasion.» Mismo si oy no puedemos oir a esta djente,por lo menos puedemos vijitar el lugar ande se paso todo.

El kuarto ande nasio el Estado es avierto al publiko i se topa ayi en la manera ke estava en el dia de 15 Mayo 1948. En las siyas del salon ay los nombres gravados de los delegados.En la pared ay un poreto grande de Theodor Herzl kon bandieras grandes de dos lados. Ay dokumentos, invitasiones, memos etc.Se puede oir lo ke fue diskutido en los diskos i ay un filmo ke konta todo.Al fin de esta seremonia ke avia tomado lugar,teniamos un Estado Judio. De su nasimiento su egzistensia estava amenazada.Las armadas Arabas atakaron i todo se torno malo.Al enkontro kon Handler,el me konto ke la Armada Ejipsiana estava bombardeando Tel-Aviv..Malgrado esto la djente estava bailando en las kayes.

Para asegurarnos ke este estado iva durar mas ke unas kuantas oras o dias les kayia a los soldado de 3 Grupos de Militias Sionostas a defender el pais kontra el enemigo.Se metieron endjuntos tornandosen a la Fuersa de Defensa/Tsava Hagana Le Israel. Los museos de Tel-Aviv mostran lo ke izieron.
El Museo de PALMACH es un museo raro ke puede interesar mismo a los ke son Museo-Phobic. Mostran una seria de Multi-Media,kon los mansevos del Palmach rekrutados antes munchas dekadas.Kontan la istoria del Palmach desde su kreasion en 1941. Konta komo se avian harvado en la Gerra de Independensia.

El Museo ETSEL representa la Organizasion Para-Militara konosida komo el IRGUN i su komandante era Menahem Begin, uno de los Primeros Ministros de Israel.

Tenian ke tomar el kontrol de Yafo komo era importante para la seguridad de Tel-Aviv. El Museo LEHI tenia ke azer mas kon un Grupo Ekstremisto el STERN GANG.

Si uno se va de vakasiones a Israel por Yom Atsmaut,puede ver muncho mas ke los museos.Munchas sivdades i aldeas tienen sus istorias a kontar. Komo se developaron estos lugares vale la pena de verlo. Se avia metido un plano en kamino para la kreasion del estado en los primeros tiempos.La Galilea en munchos sentidos era la kuna de los PionierosSionistos.Fue ayi ke el Movimiento del Kibutz enfloresio.Los imigrantes i idealistos lavoraron duro para kultivar un terreno bruto i konstruir una identidad Judia mueva ke seria un buen model. Oy esta rjion no parese del todo a lo ke era antes Ay oteles de lukso en Tiberia.Tsafat tiene un Hotel Boutique ke se yama PALACIO DOMAIN. Ay bastante alojamiento para los turistos.Una Perla de Kibutz es el Kibutz Lavi ke kaye al Oeste de Tiberia.Los Judios Britanikos del Grupo de Bnei Akiva lo konstruyeron en 1949.Tenian la idea de krear una Sosiedad Ortodoksa Moderna serka del lugar ande orijino el Talmud Palestiniano.Si pasas por ayi te van a kontar ke un tiempo este lugar era vazio.Tenian ke trayer la agua en kamiones.La tierra era echa de piedras. Oy este Kibuts tiene verduras,vakas,gainas,mansanarios,sentros de edukasion i fabrika de mueblos de alta kualidad.Konstruyeron el Hotel Lavi en los anios 1960.Les vino la idea ke munchos turistos kerian ver lo ke era el Kibutz i pasar un tiempo ayi.

El ambiente ke egzistia un tiempo se ve ayi oy mismo,despues ke munchos abandonaron este movimiento. Un Australiano ke vino aki era Johnny Oberidan.Vino en el anio 1959.En el tiempo no avia bastante para komer.El alojamiento era prove.No avian kaminos i se kaminava en el lodo.Tenian un nivel de vida muy basho.Lo ke ya tenian era el ideal de krear una sosiedad.Uno se demanda si este idealismo no se perdio kon la prosperidad. El dise ke ay unos miembros ke influensan mismo de afuera en el estranjero en sus misiones komo offisiales, medikos, emisiarios, profesores i investigadores. Eyo ayudaron mismo en la China.ElSionismo oy kontinua i tiene una otra kara. Kada uno bushka el kamino para amejorar la sosiedad i el pais.
—————————————————

Avlando de lo ke vide yo en 1951 en EMEK HAHULE i en el Kibutz Neoth Mordehai,este lugar al lado del Rio Jordan i no tan leshos de YAM AHULE era rodeado de una naturaleza salvaje kon un multitud de hazinuras. Unos kuantos anios despues el paisaje se troko.Todo se avia echo seko para kultivar la tierra. El lugar estava sano. El lago de Yam Ahule avia desaparesido i el rio se avia tornado a un kanal. La agua era divertida verso el Negev. El Kibutz tenia industrias al lado de los produktos de agrikultura. Se avia echo uno de los mas rikos en el pais. No muy leshos de ayi se topoava ROSH PINA. En el tiempo avian un multitud de barrakas para los imigrantes del Yemen. Oy este lugar es una sivdad komo las otras.

Tradusido por Shimon Geron, Sydney

Fuente: Ladinokomunita