eSefarad Noticias del Mundo Sefaradi
Una sosyeta si keda sin arte es ke le kortaron las venas de bivir.
Todos se pueden azer, enjenyores, doktores, profesores mezmo prezidentes de republikas ma todos no se pueden azer artistas
Estas son unas de las palavras del presyozo lider Turko MUSTAFA KEMAL ATATURK.
Es muy djusto, te keres azerte medisino, avokato u kualo ke seya, meldas te ambezas i parvyenes. Ma el talento es dono del dyo. Si meldas syen anyos no te puedes azer kantadera si no tyenes boz ermoza, no puedes eskrivir un livro si no tyenes enspirasyon ni puedes desinar un tablo si no tyenes imajinasyon.
El arte es ser kreativo i es dar al denfrente los sentimyentos. Por egzempyo un pintor ke desino un grafiko, mos plaze ma kale entender kon las kolores, kualo mos kijo dar a entender. Una kantika ke konosemos, todos la kantan ma de uno mos plaze mas, porke la kanta de alma i de korason.
El teatro es lo mezmo, si mos izo riyir u mos izo yorar es ke ya mos supo pasar sus sentimyentos. Esto todo es el talento de la artista.
Kual tipo del arte kere ke seya, ken se okupa del arte me da plazer de akea persona i me plaze konversar kon eya. Sovretodo si son mansevos me gusta muncho mas.
Yo, so una fenomen de teatro. Kuando va meter una pyesa en shena kada ora i punto tengo el tino aya. En azyendo echo, en eskrivyendo, en komyendo, en bevyendo, mezmo en durmyendo, munchas vezes mesperto, me vyene al tino una palavra, me alevanto tomo de nota, no esta en mi mano vo pensando al djugo, ken kualo va azer ken kualo se va vistir.
Por siguro, en formando un teatro, el dekor, las luzes son muy emportantes ma para mi los kostumes tyene otra valor. Asigun lo ke me ambezi en los kursos, ay kolores de shena. Todas las kolores no se empleyan en la shena, porke kuando se avren las luzes, ortas kolores de vedre fonse, maron, taba i grizo deranja a los ekspektadores. Kuando me ambezi esto, empesi a ver en los teatros ken kualo se vistyo. Remarki lo mas de kostumes estan enriva de estas kolores. So una buena ekspektativa porke me vo muncho a los teatros. Si mezmo una pyesa la vide, me vo de muevo i ago atansyon, komo salyo, komo kamino, ande se serro las luzes i por siguro los kostumes. Sovretodo el djugo si es djugo de epoka, los kostumes son muy emportantes. Es kon las vistimyentas ke mos dan el anyo ke sesta djugando. A mi syempre me plazyo azer djugos de oy al pasado. Es ermozo en vyendo el diya de oy, ir al pasado ver una nostaljiya. Esto komo se va dar a entender? Por siguro kon los kostumes. Atorgare lo mas ke topo plazer es, un fostan moderno del diya de oy, aboltarlo al los anyos 1940, 1950, 1960.
Emprimero bushko en el Google, avro sites i sites de vistimyentas, miro akeos tyempos ken komo se vistiya. Dospues tomo el fostan de oy, meto dantelas i kordelas, fyongos i aksesuares i kuando lo eskapo, veyo ke ya se izo de al tympo, no vos puedo dar a entender el plazer ke tomo. Munchas vezes mis amigas de teatro me dan un fostan, tanto lo troko ke me dizen este no era el fostan ke te di, i munchas vezes me dizen, yo esto no me visto a mi no me va, yo peno a konverserlas ke en la shena no sos tu, sos el karakter ke estas djugando i kale ke des al djugo lo ke merese.
Es posivle una ke esta djugando un rolo de prove ke salga a la shena kon djoyas presyozas i vistimyentas sinyadas u la kontra, una ke esta djugando rolo de vyeja ke salga a la shena kon kaveyos entrensados, i Jean, siguro ke no.
De ande me vino al tino este sujeto no se, kreyo ke ya me eskarinyi de la shena.
Al vermos.
Forti BAROKAS
Fuente: turkisrael.org.il
