eSefarad Noticias del Mundo Sefaradi
EDITORIAL de Moshe Rahmani
Los Muestros 96 – Septiembre 2014
Traducción del Francés de Selim Amado
Ser Sefaradi oy
A lo largo de los anyos vo esforsandome de espajar el terreno dando una idea global, rapida i superfisial del mundo sefaradi tal komo se prezenta en este empesijo de 5775. Ama es emportante para el meldador, ke no se kriyo kon esta kultura tan arrebiviente i ke me asigura de su amistad de seguirme dezde serka de kinze anyos para entender lo ke es un sefaradi oy.
Siguro ke kada uno i uno tiene su vizion propia. Deshadme darvos la miya i no sin guekos.
Ser sefaradi oy, es tener el sol en si. El mos meshe a todos, ma para el sefaradi, el viste una sensibili-dad partikolar. Es el sol yevado, para munchos de mozotros, de akeya Espanya, ke mos fue tan en-tranyavle , sol enrikesido por akel del Imperio Otomano, kon anyadidura del ke alumbra los Balkanes, meshe la Gre-sia, akarinya la Italia. I ke se ennovlese kon akel de Israel verso el kual van todas muestras miradas i mues-tros korasones.
Ser sefaradi oy, es yevar en si un poko de esta Peninsula Iberika ke, en un momento preto de su estoria, no mos kijo . Es reem-plasar el rekodro dolorozo de Fernando i Izabel por el, mas antiguo, de Alfonso VI el Emperador de las tres relijiones.
Ser sefaradi oy, es tener en si akeya idalgiya, akeya novlesa kavayereska ke da su enkanto a akeya Tierra de Sefarad siempre kerida de muestras almas i ke sinko siglos de absensia no dezmodra-ron en muestra me-moria kolektiva. Ansina komo lo afirmava un givir estamboli a un givir salanekli : » Kada Sefaradi i safara-di, es un princhipe «, ama sin nunka olvidar ke el princhipe solo akorda el derecho de servir. El kriya do-veres i si en vezes el Sefaradi mira kon altigueza a su semejante es para ayudarlo a abediguarse.
Ser sefaradi oy, es mantener akeya lingua, uniko trezoro yevado en 1492.Es kontinuar avlandola i enrike-siendola komo toda lingua biva, ispanizando biervos de otros.
Ser sefaradi oy, es provar de ser, komo muestros avot, un puente entre las sivilizasiones.I no fueron mues-tros avot de la Eskola de Trezladadores de Toledo akel atadero entre las sivilizasiones latina i araba , trayendo a kada una o una el konosimiento i la saviduriya ?
Ser sefaradi oy, es akodrarse, sin gaava, ke muestros grandes poetas, muestros grandes pensadores, nasidos en akeya tierra de la ke kantaron la dulsor, kontribuyeron a su grandor. Es provar de seguir, kon muestros modos i maneras, sus kaminos.
Ser sefaradi oy, es saver abokarse para mijor sintir al otro. Es atorgarle un oyido piyadozo i sinsero , es provar, siempre, de no responder por el mal a el mal sin tolerar indjustisia i maldad .Es defender el desfuer-sado i el oprimido i mamparar a la bivda o al guerfano.
Ser sefaradi oy, es vibrar para su estoria, es transmeter su kultura , es afirmarse universal.
Ser sefaradi oy, es tener el senso de la fiesta i saver azerla, mizmo kon una nada. Es aferrar kada akontesi-miento i provokar toda okazion de festejar lo ke keramos, kuando keramos i ande keramos. Solo por plaz-er , para si mizmo o para el otro.
Ser sefaradi oy, es tener la alegriya enklavada en el puerpo i alavar al Dio akompanyando kada fraza de un be ezrat H’ashem, grâce à Dieu, si kiere el Dio, Mash Alla’h en ebreo, en franses, en arabo o en djudeo-espanyol. Mizmo para el agnostiko o el ateisto.
Ser sefaradi oy, es tener el senso del espartimiento i del kavod. Es aver bevido en dos, tres kulturas i aver-las sintetizado en una partikolar, la muestra.
Ser sefaradi oy, es ser la sal ke da su savor al pan. Los Kristianos son la arina, los Muzulmanos el lievdo. O, puede ser, lo kontrario. De esta union nasio el pan.. Los Sefaradim, los Djudios son la sal i el pan se izo mijor.
Ser sefaradi oy, es semplemente ser Djudio .
Fuente: Ladinokomunita
