eSefarad Noticias del Mundo Sefaradi
Esta semana estuvimos en el primer enkontro de Dias de leche i miel, ay kuatro periodos en kada anyo, i esta turando ariva de 25 anyos.
Lo kurioso es ke la demanda de estos fastivales esta en suvidura, i kon djente ke no avlan ladino, i los enkontros estan yenos kompletamente, i vienen de todas las partes del paes.
El festival esta organizado por la Otoridad Nasionala del Ladino del norte, el presidente de honor Pesah Aaron, i sus ijas Nava i Etti.
Es una maravia partisiptar en este enkontro, ke es yeno de alegria, konosimiento de djente, konosidos, amigos , i famiyas. es buen moyen de formar relasiones muevas. Las programas son de nivel alto, i ay konferensias i moabetes, bayles, banyos kaentes, i kumida savroza.
Kada perioda tura kuatro dias, i es en el otel David, ala oria de la Mar Salada, onde ay sala de mil audientes, i es la mas grande al derredor.
El kantador Kobi Zarko es mui aktivo, i bien konosido.
La ke se okupa de todo es Anat Ben Kiki, israeliana ke bive en los Estados Unidos, i viene kada anyo para organizar todo, los otobuses, el otel, las programas, todo bien markado, explikado i presizo.
Mucha djente kon difikultas fizikas vienen i son bien aresividos.
Se ancha el korason de sintir los kantes ke amamos mucho, Avre tu ventana, Adio kirida, La vida do por el raki, Alevanta djako, Fuma, fuma, La ija de la vijina, Si la mar era de leche, i mas i mas…
Estos enkontros mos kalma la alma, en tiempos ke todo el mundo esta komo una kaldera buyendo, i parese ke esta serka de arevertir.
Esperamos ke aiga pas en el mundo, i ke tengamos la trakilidad i emosion de gustar kada anyo en estos festivales amados.
Mas ke biva el Ladino.
Kon amista!
Nissim Ashkenazi
Kiryat Motskin
Israel.
Fuente: Nissim Ashkenazi/Ladinokomunita
