eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
A la semana pasada avlí sovre los trokamientos jeografikos I demokrafikos ande los Djidios, en el siglo 20.
Oy, vamos avlar de las faktores ke tienen enfluensa sovre el numero de los Djidios en el mundo.
De manera jeneral, los ultimos 100 anyos, el largor de vida pujo i asta de los Djidios esta mas alta del promedio.
Estos 100 anyos, uvo una mengua en las hazinuras i en la muerte, a kavza de eyas, i komo el rezultato del dezvelopamientos de los uzos hijienikos ke fueron dezvelopadoso o por el adelanto de la medisina en el mundo, kozas ke estan eksterminando a munchas de las hazinuras graves i las epidemias.
Aki, ay ke remarkar ke entre los Djidios, egsitia un sistema anterior ke ayudava a sus hazinos i a sus viejos.
En el empesijo del siglo 20, uvo una gran puja demografika. En la famiya Djudia, Nasian 5 asta 6 kriaturas. Gradualmente, el nivel de la fertilidad esta abshando, entre otras, en segito de la edad del kazamiento, el mas alto porsien de los solteros, la puja de los divorsios, mas pariduras fuera del kazamiento, mas sekularizasion, la aspirasion de asemejarse al ambiente, la puja del nivel de edukasion, la enspeksion sovre la natalidad o, los kazamientos mesklados.
Ya en las primeras dekadas del siglo 20, la mengua de la fertilidad, karakteriza el sentro de la Evropa, i, de los anyos 70, eya esta deviniendo a ser mas difundida en la diaspora.
Tambien el holokausto, komo periodo trajiko enfluenso, i, esta enfluensando, asta agora, el balanso demografiko.
Poko antes de la Segunda Gerra Mundiala, en el fin de una gran prosperidad,el numero de los Djidios en el mundo, yego a kaje, 16,5 miliones de almas.
Ke podria ser la situasion demografika, si el holokausto no akontesia?
Segun el momentum de los anyos 30, podemos evaluar, ke en los anyos 90 del siglo 20, deverian de bivir en el mundo, entre 25-30 miliones de Djidios.
Despues del holokausto, en segito de la trauma i el danyo, ke fue kavzado a la tekstura de la vida, la fertilidad abasho.
Esta tendensia, esta kontinuando en la diaspora inkluso en Israel, ayi dayinda ay una tendensia de puja en la fertilidad, koza ke esta ekilibrando el promedio mundial.
En el siglo 20, ay un gran trokamiento en la identidad Djudia de la diaspora,komo rezultato de los muevos uzos de vida.
Los Djidios, pasaron un trokamiento jeografiko, ke enfluenso, i dayinda, esta enfluensando la definision de sus indentitad. El pasaje a las sivdades i a los sentros grandes, los estan dispersando i esta enkorajando sus aspirasion de asemejarsen a sus ambiente i mezmo de azer eskonder sus raises.
En la eks Union sovietika, sovre kada Djidio definido, ay entruna alma, en la mezma kaza,ke no es Djudia.
En Fransia, la tendensia de la asimilasion, esta pujando i tambien la dispersion de los Djidios, koza ke empeso relativamente mas tadre.
En el fin de los anyos 90, pujo la tendensia de los kazamientos mesklados en Rusia i en las republikas del este de la Evropa. Los niveles arivan a 80 porsien ande los ombres i a 70 porsien ande las mujeres.
El rezultato es: una reduksion de la baza Djudia.
Segun una enkuesta de los anyos 90 en los EEUU, los kazamientos mesklados, pasaron, ayi los 50 porsien.
En la numerasion Rusa, de 1994, fue topado ke solo 20 porsien de las kriaturas ke avian nasido fueron definidas komo Djudias.
Kuantimas la edad esta mas chika, el numero relativo de los non-Djidios esta pujando.
Entre los anyos 1990 i 2001, en los EEUU entre los adultos, la identidad kaje ke no troko en la ora, ke, ande los Djovenes, esta tendensia se esta indo i ancheandose.
De verdad ke esta es una tendensia preokupante, sovre la kuala ay ke pensar, seriozamente i kontra la kuala, ay ke luchar kon todas las fuersas i kon todos los medios.
