De la pluma de Sharope: THE SWIMMING POOL – LA PISINA

Konstantin Z. esta tormentado pormodo de las horrivles dolores de kavesa. A vezes le parese ke tiene un arko al rededor de su kavesa ke va apretandolo fina ke eksploze… Keryendo kombatir el fuego kon fuego asigun una vieja dicha, kuando siente esta insuportavle dolor, se ata la kavesa kon un handrajo de seda i se lo apreta fina el punto ke ya no puede mas ! Ansina emburujado, kon las puntikas del handrajo kayendo a sus ombros i tinyozo de mas en mas, echa un ojo a su refleksyon komika en el espejo de la konsola en pasando kon sus pantuflas ke va arastando en el parket de sus kuartos ofisyales, se va al lado de la ventana, trava las pezgadas kortinas i kuando ya esta en la oskuritad kalmante de su kamareta de echar, se espande en la ancha kama vaziya, finalmente empesando a relaksarse…

Konstantin Z. era kazado ma aki en Skopje biviya una vida de soltero. Lo aviyan embiyado para una mission delikada a esta sivdad. Se aviya espartido de sus kollegas en el Ministeryo de Sofia, sus amigos i sus paryentes aedados ke eran orijinaryos de Sofia des de muy munchas generasyones. El tiempo no los aviya envyejesido solamente ma los aviya dotado kon el sinizmo proprio a la edad avansada… Estava angustyado no solo pormodo de los problemes ke enkuentrava en su mission ni tampoko pormodo ke se topava en una sivdad ke puediya ser solo un kazal si se komparava a la sivdad emperyala ke era Sofia, ma ensima de todo, estava angustyado por el eskarinyo ke sintiya por su mujer, su kerida Lila de lakuala se sintiya espartido des de muncho tiempo. Lila no era de la kapital. Aviya vinido kon su madre, una mujer sola en la vida de Kazanl’k i ke se aviya murido poko tiempo dospues de de sus kazamiento. No aviya puedido ambezarse nada sovre eya malgrado sus numerozas investigasyones en metyendo en medyo sus kollegas del Ministeryo. Lila deviya vinir a su lado antes de dos mezes i meter fin a esta larga soledad, ma al lugar de esto, le estava kontando agora por la tresera vez ke no aviya rezolvado dayinda los problemes del mantenimyento de la kaza ke teniyan aya i ke deviya kedarse en Sofia !

Estava muy preokupado por eya i por la ideya ke estava sin el en este tiempo de guerra, espesyalmento savyendo ke no teniya dingunos ke puediyan ayudarla en kavzo ke lo nessesitariya..
Su famiya nunka se aviyan aserkado de eya ni la aviyan akseptado mas de serka. Avlava kon eyos una vez al mez ma kada dos diyas kon su mujer, malgrado todo modo de bruidos en la linya del telefon ke la armada aviya instalado en su buro.

Ademas, un penseryo lo estava komyendo sin desharlo en paz ! La ideya ke Lila aviya tenido una relasyon kon alguno en la kapital antes ke se vayga de kaza nunka lo deshava repozado malgrado ke saviya ke esto no era mas ke una sospecha ke se le aviya apegado ken save de ande ! Los dos aviyan tenido una vida konfortavle en sus kazamiento. Lila se okupava de la kaza ande komiyan kada diya, fuera de los diyas de Alhad kuando se ivan ande sus paryentes i los Lunes ke era el diya de konje de la mosa, se ivan a komer afuera en uno de los mijores restaurantes.

Silensyoza i yenna de misteryos femininos, Lila lo fasinava mas de siempre i el estava enteramente dedikado a eya. No teniyan kreaturas i kuanto duro ke seya por el, paresiya ke a eya no le importava del todo. Kon tiempo aviya empesado a demandarse si la kulpa era suya i el no tener kreaturas proveniya de las vezes ke aviya kontraktado la gonorrea, mizmo dos vezes de la mizma persona : una vez kuando era dayinda studente, en su primera eksperyensya fizika kon una mujer de un bordel en las afueras de la sivdad I no tan limpyo. Lo aviya arresivido esta mujer ke aviya peryido su freskor antes de su tiempo, muy makiyada i bastante godra…. La aviya angajado barato ma eya no le aviya amostrado la karta amariya komo prueva ke se iva kada semana al mediko (de toda manera no saviya ke lo puediya demandar en akel tiempo). La segunda vez ke aviya kontraktado la hazinura era de una manseva bruna, mizmo si su karta amariya estava en perfekta estado.. Su vida amoroza se divizava en dos. En primero kon sus unas kuantas vijitas al bordel i kon munchas aventuras de manseves i al kavo kon su vida kon Lila. Se sentiya dependyente de eya, de su prezensya silensyoza kuando estava kon eya, seya en kaza seya en un famozo lugar de la sivdad, de su kaminada kuando andavan abrasados en el park, de su puerpo, i lo mas kuando sin kansarsen aziyan el amor los dospues de midi alargados en Sofia.

Konstantin Z. ganava bien su vida i en mizmo tiempo asuviya de manera segura los eshelones eskarpados de su karyera en el Ministeryo deskayendo, en suportando kon flama los Ministros ke trokavan kon prestor los responsavles del Kabinet i viyan en los mansevos enerjikos komo el, una mueva enerjiya ke trayeriya un modo de freskura a la vieja organizasyon burokratika del estado en general i en su Ministeryo en partikular. Dunke profitando de ansina de tiempos en su buro, Konstantin Z. siempre tomava un paso adelantre i su karyera administrativa otra vez se endurmesiya fina la oportunitad politika siguiente. Mas de un kuarto de sus anyos de lavoro i un kuarto de siglo de su kazamiento se aviya desrolado en estos momentos de aspero i de su asuvida en su karyera burokratika fina kuando la guerra aviya empesado.

Es alora ke el Kabineto del Primer Ministro lo aviya apuntado a una pozisyon muy alta en el Komiseriato de los Asuntos Judyos i syendo el delegue del Komiseriato, lo aviya embiyado a Skopjie por su mueva mission. Las anksietades de los echos en el Komiseriato reverberava en su meoyo i kuando kedava unos momentos kon si-mizmo era komo si miles de bizbas se presipitavan a su miente. Es alora ke empesava esta dezgrasyada dolor de kavesa. Grasyas al Di-o su echo le tomava mizmo sus momentos liberos, i dunke las dolores de kavesa no le viniyan tan frekuentamente komo antes. En fakto, Konstantin Z. lavorava en un grande projekto ke nesesitava muncho lavoro al kuento del Governo. Se tratava de la «Solusyon Final». una ekspresyon sinika de los Alemanes ke sinyifikava la eliminasyon total de los Judyos de los territoryos muavamenta liberados. A la fin kuaji del anyo 1942 la realizasyon del projekto ganava mas momentum i nesesitava mas enerjiya i su dedikasyon total para yevarlo a kavo…. Sus dolores de kavesa aviyan kuaji dezaparesido.

El projekto ensima delkual Konstantin Z. lavorava asemejava a una lokomotiva ke el mizmo konduiziya kon masimum de velositad. Sus movimientos davan la impression de un viaje de aventuras ke lo eksitavan, lo teniyan psikolojikamente despierto. Estar tan tenso sinyifikava boltar su egzistensya monotona a un estado muncho mas eksitante. Kuando aviya vinido a esta sivdad a la fin del anyo pasado, su Governo ya aviya akseptado de aparejar los dokumentos : El 14 de Julyo 1941, la Ley de la Taksa por una vez solamente sovre los bienes de los Judyos ya se aviya legalizado i Konstantin Z. pensava ke era un buen paso porke iva prokurar una fortuna de 45 Milliones de Levas solo en Skopje, malgrado, ke pekado, ke era por una sola vez…. Dospues, el 4 de Oktubre, la Ley ke defendiya a los Judyos de ser patrones de un komersyo i de kompanyias industriales aviya pasado, lo ke no trusho nada. El primo de Novembre paso la ley la mas dura ke era la Ley de la Proteksyon de la Nasyon. Otra mueva ley salyo en siguida kuando Konstantin Z., el delegado del Komiseryato de los Asuntos Judyos estava meldando kon atensyon la Legislatura de su territoryo de lavoro. Estava asentado su jilet dezbotonado, aboltando en su mano la kupa de bevyenta ke su assistente le aviyan vazyado, entre las solombras de su ofisyo de Skopje ke finalmente se aviya liberado de toda manera de bruido.

Konstantin Z. no amava los Judyos ma estava kontra la «Solusyon Final» tambien porke topava ke era koza demazyada egzajerada i no serveriya a nada… Era un atavizmo – imitar kostumbres arkaikas- de ver una ideolojiya irrasyonal ke se renovelava en la Alemanya moderna. Kon la salida de las primeras leyes limitando los derechos siviles de los Judyos aviya empesado a arresivir yamadas de sus amigos, kon unos de loskualos aviyan estudyado endjuntos en la Universitad i sin del todo saver ke eran judyos en akeyos tiempos. Espesyalmente estos amigos de alta kondisyon sosyal de loskualos konosiya personalmente las famiyas, meresyentes de alavasyones en el payis de sus padres por la honor ke aviyan arresvido en los kampos de batalya al empesijo de este siglo turbulante.

Se sintiya dezrepozado durante estas reuniones kuando la gente, a siertas okazyones, ivan suportando sus argumentos kontra las pressiones i diffikultades ke enkontravan, malgrado el fakto de sus kollaborasyon por el payis komun de sus padres i por elkual unos tiempos se les aviya ekspresado gratitud . No puediya entender por ke razon, primero do todo, su payis teniya ke egzersar pression de mas en mas… Saviya ke en Alemanya la pression sovre los Judyos se estava mutando rapidamente del tono de los enflamados sosyalistos nasyonales a la marcha sin piadad kontra el destino de los non-Aryanes, rendyedo mas difisil de diya en diya sus vidas kon el terror nasyonal… Ma ke teniya de azer kon esto Sofia en partikular des de kuando ke la Alemanya konsiderava la Bulgaria i otros payizes Slaves non-Aryanes…

Preferava, por egzemplo, la poltika italiana. Los Judyos aya estavan arondjados de la sosyetad i los aviyan kayado…Ma no estavan persekutados legalmente, ekonomikamente o de manera avyerta. Es por esto ke Konstantin Z. apresyava la mezura adoptada por su Primer Ministro Bogdan Filov en la identifikasyon ovligatorya de las personas de rais judiya asigun lakuala los Judyos mas meritantes deviyan yevar la estreya blanka de sesh puntos i muncho mas chika de la estreya ordinarya amariya ke todos los otros Judyos deviyan ser markados. Este reglamento le plaziya porke le dava la oportunitad de justifikarse i trankilizar su konsiensya enfrente de las miradas sospechozas i el silensyo de sus amigos ke no akseptavan esta politika ma no ozavan komentar pormodo de la krualtad ke pujava de diya en diya….Ma en la politika i sovre todo en la administrasyon, las kozas no dependen de lo ke las personas kijyeran o las mezuras de los burokrates, ademas en peryodas tan salvajes… Konstantin Z. un brilyante burokrato, se aranjava de estar en todos los lugares enizmo tiempo. Demandava ke le prezenten listas detalyadas de las personas en las kategoriyas kritikas. Markava i komparava las informasyones kon akeyas en los arkivios de las autoritades Yugoslavas de antes. En Skopje lavorava kon habilitad i viajava siempre a Monastir (Bitola) a vezes a Shtip tambien. Skopje i Monastir lo dezrepozavan… Teniya muy muncho lavoro en estas sivdades porke aviya una grande populasyon de lakuala deviya okuparse asigun su mission. Las tradisyones de los Judyos i dunke los lienes estrechos ke manteniyan kon el puevlo eran muy profundos. Teknikamente Shtip le plaziya mas. El lugar era mas chiko, mas trankilo i mas fasil de lavorar porke aviya unos kuantos sientos de personas solamente entre la populasyon kritika.

Kuando se esfuerso de ir otra vez aya antes de finalizar lo ke teniya de azer, el Komandante del sityo no kedo de avlarle sovre komo esperava pueder el-mizmo invitarlo en serka a la mueva pisina del SPA lokal, ande las aguas termalas teniyan proprietades kurativas. Lo afishugava kon todo el korason en los ombros, riyendo kon sus karas rozeadas ke eran el signo del borrachon ke era….Le diziya ke mizmo si no lo nesesitava, relaksarse le seriya bien, espesyalmente en su muevo echo en poko tiempo… “Kezhovitsa,” le diziya… «Kezhovitsa es el mijor lugar para vozotros Senyor Konstantin Z. Este SPA es un mirakulo !» Konstantin Z. ke no teniya dinguna konsiderasyon no solo por Skopje i Bitola ma por todas las sivdades de los muevos territoryos, guadrava una opinion ke no era diferente por este kazal ande era muncho mas fasil de lavorar…. Ansina ke miro al komandante kon ojos vaziyos, lo reingrasyo kon un tono ofisyal por la invitasyon ke muy presto echo al lado de las kozas sin importansya en su tino….

En Marzo aviya resivido el orden de terminar kon la «solusyon final». Des de las primeras horas del onze del mez, siguiendo un plano detalyado los tornos para aferrar los Judyos aviyan empesado en las tres sivdades ande los Judyos biviyan. Asigun el plano i las instruksyones, arrekojiyan las personas de rais judiya, sin tomar en kuento la edad, i los enserravan en el grande edifisyo de la Monopol, la fabrika de tabakko en Skopje.

Malgrado ke no aviya puedido avlar kon Lila la semana entera, no puedyendo toparla en kaza, ni arresivyendo una yamada de eya, Konstantin Z. se sintiya kontente… Su padre lo aviya kalmado muncho en prometyendole de ver kualo se pasava kon su mujer. De toda manera, no teniya tiempo por su vida privada. Estava tornando muy tadre a kaza durante estos diyas i teniya muy pokas horas para durmir.

Los planos se estavan egzekutando de manera muy effisiente i kon muncho sukseso. Konstantin Z. aviya resivido su primer grado superyor tambien de boka por telefon en Shtip Kezhovitsa. Matematikamente i ofisyalmente su reushitad se aviya mezurado a 98 por sien. Esto reprezentava el porsiento de las 7315 personas del grupo etniko ke se aviyan apanyado i enserrado en la grande konstruksyon de Skopje, la grande sivdad industriala ke se aviya muavamente adaptado por su muevo uzo, derreado kon una alta baryera i sienes de metros de ilo de fierro (alambre de espino-dikenli tel, fil de fer barbele).

Konstantin Z. se sintiya muy poderozo i mirando al immenso edifisyo grizo, el viejo Monopol, se estava demandando si nunka aviyan reushido a detener un grupo etniko entero en un uniko edifisyo. No se atrevo, kon esto, de demandar a su superior lo ke pensava. Pensava ke meresiya alavasyon i ke puedeser no seriya una negra ideya agora ke el projekto se aviya realizado.

Los detenidos del Monopol kedaron ayi 10 diyas, durante los kualos Konstantin Z. no se espandyo sovre sus suksesos i las alavasyones ke arresivyo por la reushitad de las operasyones ma se enkargo de la operasyon delikada ke en fakto era la verdadera mission en el mizmo tema de su apuntamiento…

No oyo las bozes de estas personas I los yoros de sus kreaturas de las mujeres ke los estavan yamanda kon gritos mizmo mas dezesperados, no vido los hombres ke miravan detras de los ilos de fierro, de mas en mas silensyozos kada diya ke pasava i rogando mizmo kuando no estavan avlando, mizmo kuando los suspiros i los lamentos yegavan a sus orejas porke saviya ke su echo aki ya aviya terminado i era un hombre sensible a las mizeryas humanas i dunke era mas de probavle ke sus dolores de kavesa ivan a empesar de muevo.

Des del 22 de Marzo fina el 29, el Monopol de Skopje se vazyo en tres etapas. Tres largos wagones para transportar las bestyas se yevaron los Judyos al Norte. Konstantin Z. saviya la destinasyon de estos trenos al kampo de konsentrasyon de Treblinka… I fue justo a este tiempo ke su famiya en Sofia lo informo ke Lila aviya deshado su kaza i se aviya ido kon un ofisye mansevo. Es esto ke les aviyan dicho… Su padre le embiyo este haber -novitad- dizyendole ke des de kuando ke la aviya visto, el ya saviya ke era una mujer de kayes i era kapache de una koza asemejante. Le enkomendava de no preokuparse, terminar su echo i tornar a Sofya, no a la porkeriya ande biviya kon eya ma a su verdadera kaza, la kaza de sus aguelos… Alora se puediya topar una solusyon mueva i lojika por sierto…

Konstantin Z. peryo su gusto i todo le paresiya vaziyo i sin interes… El 30 del Marz sus dolores de kavesa empesaron de muevo kon un chuflamiento stridente en su meoyo, – silbato, sifflement, whistle- mizmo mas insuportavle del chuflamiento de los lokomotivos, sinyalando la reushitad i la fin de su mission. Un chuflamiento ke nunka terminara…

Kedo enkaza el diya entero, enserrado en su kamareta de echar, kon el handrajo de seda appretado al torno de su kavesa, ensima de sus ojos, echado en la kama vaziya, kon sus brasos tendidos a la segunda mitad ande Lila uzava echarse. Puediya oyir en su kavesa los gritos de las personas miles de personas enserradas unos ensima de los otros en el edifisyo del Monopol de Skopje…

Se aviya ambezado en su echo ke esta operasyon de sakrifikar los judyos de los muevos territoryos era koza ke el Estado deviya kumplir i ke su patria aviya kitado el orden de salvar sus Judyos ke eran dopyos de los ke el aviya embiyado al kampo de la muerte. En pensando a esto sintyo un spazmo mas fuerte en su kavesa. Le vino ganas de gomitar I se alevanto pishin, estava viendo alamparas…Respiro profundamente. El spasmo involuntaryo le aviya provokado una muy fuerte dolor al estomago. No puido liberarse del malestar… Kon los tres trenos su vida tambien se estava indo a una direksyon deskonosida I definitivamente peryida…

Se esperto kon el sonido del telefon privado. Kon un grande esfuerso se alevanto I se fue a su lado. El sol de avril estava entrando por la ventana I inchendo la kamareta. Era el komandante de Shtip avlando kon la mizma kordyalitad alegre ke un tiempo aviya espertado en el desdenyo ma ke agora, sorprendyentamente, lo konfortava komo un salva-vida !

Lo estava yamando para dizirle ke la pisina del SPA del Kezovitsa estava pronta i, komo prometido, le estava telefonando personalmente para invitar el delegado de vinir para un bien-meresido relakso en sus aguas mineralas kurativas. Kuando Konstantin Z. lo reingrasyoi se kesho de sus dolores de kavesa ke lo estavan matando, el Komandante le respondyo ke era presizamente la razon por lakuala deviya vinir al SPA.

“Kezhovitsa es justo el lugar ke vos kale Senyor..”

Konstantin Z. estava nadando en la pisina del SPA de Kezhovitsa en Shtip luchando kon sus sentimientos de regreto por ser vinido a esta sivdad provinsial i a este SPA, tratando de no mirar al fondo de la mueva pisina kon sus marbros rektangularios ke estavan gravados kon sienes de sinyos angularios. Malgrado ke no puediya meldarlos Konstantin Z. saviya kualo eran ! Titros, nombres i alkunyas, datas de nasimyento i de fayasimiento, epitafios en las piedras de las tombas de los muertos enterrados… Unos des de tiempos se aviyan tornado a ser polvo i siniza en el simeteryo judyo de Shtip. Eran los restos de los humanos ke aviyan kompletado sus destinos ke antes siglos formavan parte de la vida urbana de Shtip. Las aviyan arankado para azer el fondo de la pisina de Kezovitsa kon sus aguas termalas kurativas… Estas aguas no ayudavan Konstantin Z. Kon esto lo relaksavan un poko en nadando kon su puerpo pezgado ensima de los marbros del fondo de la pisina. Se arezvalava kon indolensya, indiferente, ariva de los nombres, de los destinos i de las solombras de los muertos, tratando de no mirar a sus simbolos, a los sinyos ke kedaran por siempre gravados en el marbro antiko debasho de el i ke la agua lava. El delegado del Komisariato de los Asuntos de los Judyos viya komo si fuera malgrado el i kuaji forsandolo, los sinyos engrandesidos komo kon una lupa en frente de sus ojos serrados i las sejas fronsadas … Kontinuo a nadar, tratando de alivyanar la pression ke sintiya en su puerpo entero i aplazar (deshar a mas tadre, postpone, remettre, ertelemek) la kriza nervioza -la lokura- ke se le estava aserkando.